Հաստատ վախենալ պետք չէ

Այս օրերին տեղի ունեցող իրադարձություններն ուղիղ ճնշման մեթոդներ են: Այսպես լինում է, երբ երկիրը սպասման մեջ է, այսպես լինում է, երբ սրվում է պայքարն իշխանության համար:

Այս օրերին հայտնվում են «քաջեր», որոնք բացառում են բոլոր փոխզիջումները: Նրանք իրենց ներկայացնում են ամենահայրենասեր, ամենասկզբունքային եւ ամենախիզախ գործիքներ: Իրականում այսպիսի դիրքորոշման պատճառով մենք հարյուր տարի առաջ մի լավ դաս ստացանք, բայց կարծես որեւէ հետեւություն չենք արել:

Նիկոլ Փաշինյանի կողքին հավաքվել են մեծ եւ փոքր տղաներ եւ աղջիկներ, որոնք արդեն առնում են իշխանության հոտը եւ ամեն կերպ Նիկոլին հետ են պահում փոխզիջումներից: «Նիկոլ գնա առաջ դու քաջ ես», «Նիկոլ գազ տուր», «Նիկոլ դու նահանջող տղա չես»,- ասում են նրանք Նիկոլին եւ տրորում ձեռքերը, քանի որ գոհ են, երջանիկ: Առայժմ Նիկոլը նրանց գերին է: Նիկոլին չեն թողնում մտածել: Նիկոլին ներշնչել են, թե ցանկացած փոխզիջում, ողջամիտ քայլ նահանջ է եւ պարտություն:

Ցավն այն է, որ անհանդուրժողականությունն ու փոխզիջումային տարբերակների բացառումը նպաստում է երկրում ստեղծված անարխիայի խորացմանը: Նիկոլ Փաշինյանը պետք է օր առաջ գիտակցի, որ Սերժ Սարգսյանի հրաժարականը պահանջող հարյուր հազարավոր զանգվածը բոլորովին էլ մանկուց չէր երազում, որ վարչապետ պետք է դառնա Նիկոլ Փաշինյանը:

Նիկոլ Փաշինյանն արդեն իսկ կարեւոր գործ է արել: Հիմա նա պետք է կանգ առնի, հանգիստ նայի շուրջը, նկատի Հայաստան երկիրը, նրա գործընկեր ԱՄՆ-ին, Ռուսաստանին, հարեւաններ Թուրքիային եւ Ադրբեջանին, եւ իհարկե Վրաստանին եւ Իրանին:

Նրանց հետ արդեն ցույց-ցույց, հանրահավաք-հանրահավաք խաղալը չի անցնի: Նրանք ուզում են հասկանալ, թե ինչ է ուզում Նիկոլ Փաշինյանը եւ մինչեւ ուր է ուզում գնալ: Նրանցից յուրաքանչյուրը պատրաստ է այս իրավիճակում առաջ տանել իր սեփական շահերը: Չի կարելի նեղ խմբակային շահերի բավարարման համար զոհասեղանին դնել Հայաստան երկիրը:

Եւ այստեղ իրենց բացասական դերակատարումն ունեն նաեւ ՀՀԿ-ական որոշ օդիոզ գործիչներ, որոնք փոխանակ մկան ծակը մտնեն, դեռ խոսում են, դասեր տալիս, ավելի գրգռելով ժողովրդին եւ խանգարելով փոխզիջումների ձեռքբերմանը:

Եվ, վերջապես, եթե ժողովուրդն իսկապես ուզում է, որ հենց Նիկոլը դառնա ՀՀ վարչապետ, ապա ինչո՞ւ են վախենում արտահերթ խորհրդարանական ընտրություններից, որոնց պատրաստակամությունն, ի դեպ, ներկայիս վարչապետի պաշտոնակատար Կարեն Կարապետյանը հայտարարել է: Եթե ժողովուրդը միասնական է ու բոլորը՝ մեծից փոքր հրապարակում «Նիկոլ» են վանկարկում, ապա ՀՀԿ-ն ինչպե՞ս պետք է հաղթի: Ինչո՞ւ է Նիկոլը վախենում: Հաստատ վախենալ պետք չէ:

Արսեն Հակոբյան