YouTube-ից անհետացել է աշխարհի ամենադիտված տեսանյութը

Լրատվամիջոցները հայտնել են աշխարհի ամենադիտված տեսանյութի՝ YouTube-ից «անհետացման» մասին։ The Independent-ը մասնավորապես նշում է, որ YouTube-ից անհետացել է պուերտոռիկացի երգիչ Լուիս Ֆոնսիի Despacito երգի պաշտոնական տեսահոլովակը, որը համարվում է աշխարհի ամենադիտված տեսանյութը:

Աղբյուրի տվյալների համաձայն՝ ռեկորդային 5 մլրդ դիտում հավաքած տեսանյութը հեռացրել են Prosox and Kuroiʼsh խմբավորման հաքերները:

Նշվում է, որ հաքերները փոխարինել են տեսահոլովակն իրենց ֆայլով, որում պատկերված են դիմակներ կրող և զենք բռնած անհայտ անձինք: Տեսահոլովակի նկարագրությունում հայտնվել է «Ազատագրե՛ք Պաղեստինը» արտահայտությունը:

Այժմ տեսահոլովակը բեռնելու ժամանակ մի շարք երկրների օգտատերեր տեղեկատվական հաղորդագրություն են տեսնում այն մասին, որ ֆայլը հեռացված է:

YouTube-ի և Vevo ալիքի ներկայացուցիչները դեռևս չեն մեկնաբանել իրավիճակը: