«Վերջին Մահիկյան» սերիալի դերասանը 22 տարով դատապարտվել է մանկական պոռնո նկարահանելու համար

Դերասան Մուխտար Գուսենհաջիեւը, որը նկարահանվել է «Վերջին Մահիկյանը» սերիալում, 22 տարվա ազատազրկման է դատապարտվել մանկական պոռնոգրաֆիա պատրաստելու համար: Այս մասին հայտնել է ՌԴ ՔԿ Մոսկվայի քննչական գլխավոր վարչության ղեկավարի ավագ օգնական Յուլյա Իվանովան, փոխանցում է ՏԱՍՍ-ը:

«Քննչական մարմինների հավաքած ապացույցները դատարանը բավարար է համարել 53-ամյա Մուխտար Գուսենհաջիեւի նկատմամբ դատավճիռ կայացնելու համար: Նա մեղավոր է ճանաչվել ՌԴ Քրեական օրենսգրքի 132 հոդվածի 4-րդ մասով («Սեքսուալ բնույթի բռնի գործողություններ անչափահասի նկատմամբ՝ պոռնոգրաֆիական նյութեր պատրաստելու նպատակով»)»,- հայտնել է Իվանովան:

Քննությունը եւ դատարանը հաստատված են համարել, որ 2012-2015 թվականներին Գուսենհաջիեւը ազգականների եւ ծանոթների երեխաների նկատմամբ սեքսուալ բնույթի բռնի գործողություններ է կատարել: Դրանից բացի, նա ծանոթացել է երեխաներ ունեցող կանանց հետ եւ հետագայում երեխաների նկատմամբ հակաիրավական գործողություններ կատարել: Ամբաստանյալի տան խուզարկությամբ մանկահասակ երեխաների մասնակցությամբ պոռնոգրաֆիական տեսանյութեր են հայտնաբերվել:

«Քննության շրջանակում նշանակվել եւ անցկացվել են բժշկական, սեքսոլոգա-հոգեբանա-հոգեբուժական համալիր, հոգեբանա-լեզվաբանական փորձաքննություններ, որոնց եզրակացությունները քննությանը թույլ են տվել բոլոր 6 դրվագներով տղամարդուն մեղսագրվող մեղքը հաստատված գնահատել»,- հավելել է Իվանովան: Մոսկվայի Տագանսկյան դատարանի դատավճռով Գուսենհաջիեւին պատիժ է նշանակվել 22 տարի ժամկետով ազատազրկում՝ խիստ ռեժիմի ուղղիչ գաղութում:

2015 թվականի սեպտեմբերին Գուսենհաջիեւը ձերբակալվել է եւ կալանավորվել է 9-ամյա աղջկա նկատմամբ սեքսուալ բնույթի բռնի գործողությունների մեղադրանքով: Այդ ժամանակ աղբյուրը հայտնել էր, որ սեպտեմբերին դերասանը աղջկա նկատմամբ բազմիցս սեքսուալ բնույթի բռնի գործողություններ է կատարել, մեկ անգամ դա տեղի է ունեցել Մոսկվայի հայկական թատրոնում: