ԼՂ հարցը ԱՄՆ-ի, Եվրոպայի ու Ռուսաստանի համար դարձել է միակը, որտեղ կա կոնսենսուս. Ս. Տարասով

Ադրբեջանի նախագահ Իլհամ Ալիևի հայտարարությունը, թե իրենք «վերադարձնելու» են Ղարաբաղը, երկրորդական է: Այս մասին Tert.am-ի հետ զրույցում ասաց Մերձավոր Արևելքի և Կովկասի երկրների հարցերով ռուսաստանցի փորձագետ Ստանիսլավ Տարասովը:

«Ադրբեջանն այնքան է իր «տեսակետների» մեջ խորասուզվել, որ սկսել է առաջնորդվել միֆոլոգիայով: Ալիևը փորձառու գործիչ է, բոլորը հասկանում են, որ այս ամենը նախընտրական փուլում հնչեցված ելույթներ են։ Ադրբեջանի արտաքին գործերի նախարարության մամուլի խոսնակը հայտարարում է, որ իրենք կողմնակից են ինտենսիվ բանակցություններ վարելուն, բայց Ալիևն իր այս ագրեսիվ հայտարարությամբ միայն հարվածում է բանակցային գործընթացին»,- ասաց Ստանիսլավ Տարասովը:

Փորձագետի խոսքով՝ կատարվողը «անեկդոտի» մակարդակում է: Տարասովը նկատեց, որ ԵԱՀԿ Մինսկի խումբը օրերս տարածաշրջանում էր, և այդ օրերին «Երևանը հետ բերելու» մասին խոսակցությունները միայն հարվածում են բանակցություններին, դրա համար էլ պաշտոնական Մոսկվան այդ մտքին շատ զգույշ է արձագանքել:

Հարցին՝ ինչո՞ւ է միջազգային հանրությունը լռում, երբ Ադրբեջանը հրապարակայնորեն հայտնում է Երևանի նկատմամբ ունեցած իր նկրտումների մասին, Տարասովը պատասխանեց. «Ադրբեջանի պատմությունը գրում են ոչ միան ադրբեջանցիները: Կա միջազգային պատմություն, համաշխարհային պատմություն, որը տեղն է գցում ամեն ինչ: Վերջ, Արցախը կա, Արցախը 30 տարի է այսպիսին: Դիվանագիտական, քաղաքական բոլոր միջոցները գործադրվել են:

Եթե Ադրբեջանում կարծում են, որ Արցախը իրենց տարածքն է, ուրեմն այդ տարածքում բնակվող մարդկանց չպետք է անվանեն այլմոլորակայիններ, չի կարելի սեփական ժողովրդին այդպես անվանել: Իսկ եթե իրենք ուզում են տարածքը զավթել առանց հայերի, որևէ մեկը դա իրենց թույլ չի տա»:

Փորձագետը նշեց, թե իր համար անհասկանալի է՝ ինչ է կատարվում բանակցություններում, ինչի շուրջ են հանդիպում հակամարտության կողմերը՝ այն էլ բարձր մակարդակով:

«Ես ոչինչ չեմ կարողանում հասկանալ, չեմ կարողանում հասկանալ՝ ինչ է կատարվում, 30 տարի է՝ բանակցություններ են ընթանում, փակ ռեժիմով հանդիպումներ են անցկացվում, բայց չի կարելի 3 տասնյակ փակ բանակցություններ անցկացնել, երբ որոշվում է ժողովրդի ճակատագրի հարցը: Մեզ հայտնի է, որ բանակցությունների սեղանին որոշակի փաստաթղթեր կան, բայց ուրիշ ոչինչ մենք չգիտենք»,- նշեց նա:

Տարասովը շեշտեց՝ իր համար անհասկանալի է նաև, թե ինչի շուրջ են խոսում նախագահներ Սերժ Սարգսյանն ու Իլհամ Ալիևը:

«Դիվանագիտական աշխատանքին ծանոթ մարդիկ գիտեն, որ դիվանագետները խոսում են բացառապես փաստերի մասին: Նրանք չեն կանխատեսում, չեն ենթադրում, խոսում են զուտ փաստերի մասին: Ես հաշվեցի, թե քանի անգամ են հանդիպել Սերժ Սարգսյանն ու Ալիևը: 10-15 անգամ հանդիպել են, ի՞նչ են արել, ի՞նչ են խոսել, որ այսքան հանդիպել են, նարդի՞ են խաղացել, թե՞յ են խմել: Ոչ, ուրեմն կա քննարկումների մի շրջանակ, կա մի թեմա, որը քննարկում են, բայց մենք այդ մասին չգիտենք»,- ասաց Ստանիսլավ Տարասովը:

Խոսելով ԵԱՀԿ Մինսկի խմբի աշխատանքի մասին՝ Տարասովը նշեց, որ Ռուսաստանը թույլ դիրքեր է ունեցել, բայց հետագայում ամրապնդել է իր դիրքերը. արդյունքում Ղարաբաղյան հարցը ԱՄՆ-ի, Եվրոպայի ու Ռուսաստանի համար դարձել է միակը, որտեղ կա կոնսենսուս:

«Սիրիայի հարցով վիճում ենք, Ուկրաինայի հարցով վիճում ենք, բայց Ղարաբաղի հարցով որևէ տարաձայնություն չկա, համաձայնություն է, կոնսենսուս: Սա հանելուկ է, ուրեմն կա մի ծրագիր, մի պրոյեկտ, որը նրանք քննարկում են»,- հավելեց փորձագետը: