Մոսկովյան դատարանը հրաժարվել է չեղարկել Ջիգարխանյանի և Ցիմբալյուկ-Ռոմանովսկայայի ամուսնալուծությունը

Մոսկվայի Կունցևո շրջանի վարչական դատարանը հունվարի 31-ին հաստատել է ԽՍՀՄ ժողովրդական արտիստ Արմեն Ջիգարխանյանի և դաշնակահարուհի Վիտալինա Ցիմբալյուկ-Ռոմանովսկայայի ամուսնալուծության վճիռը, ինչի մասին ria.ru-ին հայտնել են դատարանի մամուլի ծառայությունից:

Աղբյուրը մանրամասնում է, որ վճռի բողոքարկման հարցով դատարան էին դիմել 39-ամյա Ցիմբալյուկ-Ռոմանովսկայայի փաստաբանները:

Հիշեցնենք, որ 82-ամյա Ջիգարխանյանի և նրանից 44 տարով փոքր կնոջ շուրջ ընտանեկան սկանդալը ծագել էր նախորդ տարվա հոկտեմբերին: Այն ժամանակ արտիստը հոսպիտալացվել էր ու պատմել, որ «ստոր կինը խաբեությամբ տիրացել է իր ունեցվածքին»:

Դրան զուգահեռ, Ցիմբալյուկ-Ռոմանովսկայան, որը զբաղեցնում էր Ջիգարխանյանի թատրոնի տնօրենի պաշտոնը, սեփական դիմումի համաձայն հեռացվել է պաշտոնից ու հայտարարել ամուսնալուծվելու ցանկության մասին:

Արդյունքում նոյեմբերի վերջին դատարանը բավարարել է ամուսնալուծության վերաբերյալ հայցը, իսկ դեկտեմբերի սկզբին Ցիմբալյուկ-Ռոմանովսկայայի դեմ մեղադրանք է ներկայացվել՝ տարեց ամուսնու անձնական կյանքին վերաբերող նյութերն առանց նրա համաձայնության լրատվամիջոցներում տարածելու համար:

Նշվում է, որ կնոջն ազատ են արձակել չմեկնելու մասին ստորագրության դիմաց: Մինչդեռ Ցիմբալյուկ-Ռոմանովսկայայի փաստաբանը նշել է, որ մեղադրանքները հորինված են և որ ինքը գործում դատական հեռանկար չի տեսնում:

Հիշեցնենք, որ oրերս Ցիմբալյուկ-Ռոմանովսկայան «Թող խոսեն» թոք շոուի ժամանակ կրկին խոսել է նախորդ տարվա հոկտեմբերից մինչև հիմա իրենց ընտանիքում շարունակվող սկանդալի շուրջ: Վերջին երեք ամսում «Թող խոսեն»-ին տված առաջին հարցազրույցում 39-ամյա Ցիմբալյուկը նշել է, որ դեռևս սիրում է ամուսնուն, ուզում է հանդիպել նրան ու ամեն ինչ հանգիստ քննարկել:

Հաղորդավարի այն հարցին՝ արդյոք Ցիմբալյուկը սիրել է տարեց ամուսնուն, նա պատասխանել է. «Ես միանշանակ նրան սիրել եմ: Մեր սիրավեպը սկսվել է, երբ ես 20 տարեկան էի: Ես ամբողջովին տրվեցի նրան: Ինձ հաճախ մեղադրում են շահամոլ լինելու համար, սակայն չեմ հասկանում, թե ինչու: Նա իմ կարիքն ուներ, բայց երևի ոչ թե սիրում էր ինձ, այլ ուղղակի իմ կարիքն ուներ: Սիրե՞լ է, թե՞ ոչ. այս հարցի ճիշտ պատասխանը կարող է տալ միայն Արմեն Բորիսովիչը»: