Մենք դա կանենք, և ամեն ինչ կավարտվի Ուկրաինայով

ԱՄՆ նախագահ Դոնալդ Թրամփը CBS News հեռուստաալիքի «60 րոպե» հաղորդմանը տված հարցազրույցում մի շարք հայտարարություններ է արել Ուկրաինայում ընթացող պատերազմի վերաբերյալ։ Պատերազմի ավարտի մասին հարցին ի պատասխան՝ Թրամփը հիշատակել է նոյեմբերի 10-11-ը Աբու Դաբիում կայանալիք Ուկրաինայի, Ռուսաստանի և ԱՄՆ-ի պատվիրակությունների եռակողմ բանակցությունները և հայտարարել. «Կարծում եմ՝ մենք դա կանենք, և ամեն ինչ կավարտվի Ուկրաինայով, որը մի փոքր այլ տեսք կունենա»։

ԱՄՆ նախագահը չի հստակեցրել՝ արդյոք նկատի ունի տարածքային զիջումներ, թե մեկ այլ բան։ Հաղորդավարը Թրամփին հարցրել է նաև, թե ում է նա ավելի շատ վստահում՝ Ռուսաստանի նախագահ Վլադիմիր Պուտինին, թե ուկրաինացի առաջնորդ Վլադիմիր Զելենսկուն, ինչին Սպիտակ տան ղեկավարը պատասխանել է. «Ավելի լավ է դա չասեմ, բայց ես լավ հարաբերություններ ունեմ երկուսի հետ էլ»։

Լրագրողի այն հարցին, թե որն է պատերազմի ավարտի ամենամեծ խոչընդոտը, Թրամփը կրկնել է նախկինում բազմիցս հնչեցրած թեզը՝ Պուտինի և Զելենսկու միջև առկա ատելության մասին։ Հաղորդավարի այն դիտարկմանը, որ ուկրաինացի առաջնորդին կարելի է հասկանալ, քանի որ նրա երկիր լայնամասշտաբ ներխուժում է տեղի ունեցել, Թրամփն արձագանքել է. «Այո, դա այդպես է, բայց երբ նրանք ունեցան իրենց առաջին հանդիպումը, Ռուսաստանի հանդեպ հսկայական անհարգալից վերաբերմունք դրսևորվեց։ Այնպես որ, ես ոչինչ չեմ ասի»։ Նա չի հստակեցրել, թե հատկապես որ «առաջին հանդիպման» մասին է խոսքը։

Լրագրողը նաև հարցրել է նախագահին, թե արդյոք նա չի կարծում, որ Պուտինն իրեն մատների վրա խաղացնում է, ինչին Թրամփը բացասական պատասխան է տվել։ Բացի այդ, Սպիտակ տան ղեկավարը նշել է, որ չգիտի, թե ով է կայացրել ուկրաինացի զինվորականների համար արբանյակային ինտերնետի դանդաղեցման որոշումը, և արդյոք դա եղել է Space X ընկերության ղեկավար Իլոն Մասկը. «Ես չեմ կարող ձեզ ասել, թե ով է անջատել այդ համակարգը։ Բայց կարող եմ ասել, որ ի վերջո նա այն նորից միացրել է, այնպես որ նրանք ունեն դա»,- ասել է Թրամփը։