Էջմիածնում պատվիրակված ծառայություն կմատուցեն կյանքի դժվարին իրավիճակում հայտնված երեխաներին

Վաղարշապատի համայնքապետարանը  հինգ տարով անհատույց օգտագործման իրավունքով տարածք է տրամադրել «Արմավիրի զարգացման կենտրոնին»։ Այդ հասարակական կազմակերպությունը անվճար սոցիալ-հոգեբանական աջակցություն ցուցաբերում ծանր իրավիճակներում հայտնված երեխաներին:

Վաղարշապատ համայնքում կյանքի դժվարին իրավիճակներում հայտնված երեխաների համար օգնություն ստանալու ակնկալիքով շատ հաճախ ծնողները տարբերր կազմակերպությունների են դիմում, որոնք գտնվում են այլ բնակավայրերում: Հեռավորության ու տրանսպորտային դժվարությունների պատճառով, սակայն, ոչ բոլոր երեխաներն են կարողանում օգտվել այդ ծառայություններից: Էջմիածնի բնակիչ Լիլիթի երեխան աուտիստիկ սպեկտրի խանգարում ունի։ Երեխան շաբաթական մի քանի օր հաճախել է Վարդենիսի, ապա Արմավիրի երեխաների աջակցման կենտրոններ: Սակայն Ճանապարհի դժվարություններից ելնելով՝ այցելությունները կրճատվել են:

«Արմավիրի զարգացման կենտրոնի» մասնագետները, ծնողների խնդրանքով, Էջմիածնի Զվարթնոց թաղամասում որոշ ծառայություններ են  մատուցում: Վաղարշապատ համայնքի՝ կյանքի դժվարին իրավիճակներում հայտնված, ինչպես նաև հաշմանդամություն ունեցող երեխաներին վերականգնողական աջակցությունը հասանելի ու մատչելի դարձնելու համար, ավագանու որոշմամբ Արմավիրի զարգացման կենտրոնին Էջմիածնում շուրջ 130 քմ ոչ բնակելի տարածք է տրամադրվել՝ ասում է Վաղարշապատի համայնքապետարանի սոցիալական ծրագրերի և առողջապահության հարցերի բաժնի գլխավոր մասնագետ Սվետլանա Մուրադյանը:

««Արմավիրի զարգացման կենտրոն» սոցիալ-տնտեսական հասարակական կազմակերպությանը հինգ տարի ժամկետով, անհատույց օգտագործման իրավունքով տրամադրվել է Վաղարշապատ համայնքի սեփականությունը հանդիսացող Էջմիածին քաղաքի սբ. Մեսրոպ Մաշտոցի փողոցում գտնվող հաստատություն, որպեսզի իրենց սոցիալ-հոգեբանական ծառայությունները ստանան շուրջ 100 երեխաներ, որոնք հայտնվել են կյանքի դժվարին իրավիճակում»:

Վաղարշապատում երեխաների աջակցության կենտրոնը ստեղծվել է «Հզոր քաղաքացիական հասարակություն՝ հանուն երեխաների հզորացված պաշտպանության» ծրագրի շրջանակում։ Այն ֆինանսավորում է Գերմանիայի տնտեսական զարգացման և համագործակցության նախարարությունը։ Ծրագիրն իրականացնում են «Վորլդ Վիժն Գերմանիա», «Վորլդ Վիժն Հայաստան» երեխաների պաշտպանության հիմնադրամը և գործընկեր չորս կազմակերպություններ: Տրամադրված տարածքը, սակայն, անմխիթար վիճակում է և վերանորոգման կարիք ունի՝ ասում «ԱԶԿ» ՀԿ-ի նախագահ Նաիրա Առաքելյանը:          

«Պետք է փորձենք համատեղ ուժերով նաև վերանորոգումը կազմակերպենք, որպեսզի 2027թ.-ին դիմենք Աշխատանքի և բարեկեցության նախարարություն և պատվիրակված ծառայություն իրականացնենք նաև Վաղարշապատ խոշորացված համայնքում: Այնտեղ նմանատիպ ծառայություն չկա, անհասանել է»:

Աշխատանքի և բարեկեցության նախարարությունը «Ամքոր» բարեգործական հասարակական կազմակերպության հետ հիմա պատվիրակված ծառայություն է մատուցում Արմավիրի երեխաների աջակցության «Արևածագ» կենտրոնում, որտեղ բազմամասնագիտական թիմ է աշխատում: Կենտրոնի ծառայության արդյունավետությունը երևում է հերթագրված երեխաների թվից՝ ասում է Նաիրա Առաքելյանը:

«Եթե որակյալ ծառայություններ չմատուցեինք, ծնողները չէին հերթագրվի, և երեխաների պակաս կունենայինք: Բայց այսօր մենք նույնիսկ չենք հասցնում բոլոր դիմած երեխաներին ծառայություններ մատուցել: Ստիպված ենք պարբերաբար, որոշակի ծառայություններ մատուցելուց հետո, իրենց ուղարկել հանգստի և նոր երեխաների ընդգրկել, որովհետև կարիքը շատ մեծ է»:       

Զվարթնոցում գործող կենտրոնում հիմա ծառայություններ են մատուցում հոգեբանը, լոգոպետը, հատուկ մանկավարժն ու սոցիալական աշխատողը: Նաիրա Առաքելյանն ասում է, որ Էջմիածնում կենտրոն բացելուց հետո կավելանա աշխատողների թիվը:

armradio.am