Արգենտինացիների ավագը կմասնակցի առաջիկա ընկերական հանդիպումներին

Ամերիկյան «Ինտեր Մայամիի» 39-ամյա հարձակվող Լիոնել Մեսսին իր կարիերայում վերջին անգամ հրավիրվել է Արգենտինայի ազգային հավաքական։ Այս մասին պաշտոնապես հայտնում է Արգենտինայի ֆուտբոլի ասոցիացիայի (AFA) մամուլի ծառայությունը։

Արգենտինացիների ավագը կմասնակցի առաջիկա ընկերական հանդիպումներին, որտեղ «ալբիսելեստեն» ուժերը կչափի Բոլիվիայի (սեպտեմբերի 30), Բուրկինա Ֆասոյի (հոկտեմբերի 3) և Բենինի (հոկտեմբերի 6) ազգային ընտրանիների հետ։

Ինչպես հաղորդվում էր ավելի վաղ, հոկտեմբերի 6-ին Բենինի դեմ կայանալիք խաղը Մեսսիի համար կլինի հրաժեշտի հանդիպումը ազգային թիմի մարզաշապիկով։ Այն կանցկացվի Բուենոս Այրեսի լեգենդար «Մոնումենտալ» մարզադաշտում, որտեղ ֆուտբոլիստը հնարավորություն կունենա հրաժեշտ տալ հավաքականի երկրպագուներին։ Սպասվում է, որ այս նշանակալի խաղին կհրավիրվի 2022 թվականի աշխարհի առաջնությունում հաղթանակած Արգենտինայի հավաքականի ողջ կազմը։

Հիշեցնենք, որ 2026 թվականի աշխարհի առաջնությունից հետո՝ օգոստոսի 31-ին, Մեսսին պաշտոնապես հայտարարել էր միջազգային կարիերան ավարտելու մասին։ Նա Արգենտինայի գլխավոր թիմի գույները պաշտպանում էր 2005 թվականից։ Այս ընթացքում հարձակվողն ազգային հավաքականում անցկացրել է ընդհանուր առմամբ 207 հանդիպում՝ դառնալով 125 գոլի և 68 արդյունավետ փոխանցման հեղինակ։ Մեսսին Արգենտինայի հավաքականի հետ դարձել է 2022 թվականի աշխարհի չեմպիոն և երկու անգամ նվաճել Ամերիկայի գավաթը։