Ռուսաստանը վաղաժամ քվեարկություն է անցկացնում Ուկրաինայի օկուպացված շրջաններում

Ռուսաստանը խորհրդարանական ընտրությունների վաղաժամ քվեարկություն է սկսել Ուկրաինայի Դոնեցկի մարզի՝ իր վերահսկողության տակ գտնվող շրջաններում։ Ընտրողներին և հանձնաժողովների անդամներին ուղեկցում են զինված ուժայիններ։
 
Սեպտեմբերի 14-ին շրջիկ ընտրական խմբերը շրջել են գյուղական բնակավայրերում՝ իրենց հետ բերելով քվեատուփեր և շարժական քվեախցիկներ: Բնակիչները քվեարկել են իրենց տների մոտ, իսկ գործընթացին հետևել են Ռուսաստանի Կենտրոնական ընտրական հանձնաժողովի ներկայացուցիչները՝ ռուս զինծառայողների և ոստիկանների ուղեկցությամբ:
 
Խորհրդարանական ընտրություններն ամբողջ Ռուսաստանում կանցկացվեն սեպտեմբերի 18-20-ը։ Կրեմլն այս քվեարկությունը ներկայացնում է որպես հանրային կարծիքի «չափում» Ուկրաինայում պատերազմի մասին, որն ընթանում է արդեն հինգերորդ տարին։ Վաղաժամ քվեարկությունը տեղի է ունենում նաև մի քանի մերձճակատային շրջաններում, որտեղ, ըստ Ռուսաստանի իշխանությունների, նման միջոցառումներն անհրաժեշտ են Մոսկվայի սահմանած ռազմական դրությունը պահպանելու և ընտրողներին ու ընտրական հանձնաժողովների աշխատողներին պաշտպանելու համար:
 
Ուկրաինայի անվտանգության ծառայությունը օկուպացված տարածքների բնակիչներին կոչ է արել չքվեարկել՝ նախազգուշացնելով, որ ընտրությունների կազմակերպումը կամ մասնակցությունը կարող է քրեական հանցագործություն համարվել Ուկրաինայի օրենսդրությամբ, ինչի համար սահմանված է մինչև 10 տարի ազատազրկում։ 
 
Կիևը և արևմտյան երկրներն օկուպացված ուկրաինական տարածքներում անցկացվող ընտրությունները համարում են անօրինական՝ դրանք անվանելով «կեղծ ընտրություններ», որոնք նախատեսված են օրինականացնել Մոսկվայի վերահսկողությունն այդ շրջանների նկատմամբ։