Լիոնել Մեսսին «նախնական համաձայնություն» է ձեռք բերել «Էլդենսե» ակումբի բաժնետեր դառնալու վերաբերյալ

Իսպանական երկրորդ լիգայի «Էլդենսե» ակումբը հայտնել է, որ արգենտինացի լեգենդար ֆուտբոլիստ Լիոնել Մեսսին «նախնական համաձայնություն» է ձեռք բերել ակումբի մաժորիտար բաժնետեր դառնալու վերաբերյալ:

«Էլդենսեն» կդառնա իսպանական երկրորդ ակումբը, որում ներդրում է կատարել Մեսսին. ապրիլին նա ձեռք էր բերել կատալոնական «Կորնելյա» ակումբը:

«Բարսելոնայի» 39-ամյա նախկին հարձակվողն այժմ հանդես է գալիս «Ինտեր Մայամիում» և վերջերս է ավարտել ելույթները ազգային հավաքականի կազմում՝ այն բանից հետո, երբ Արգենտինան 2026 թվականի Աշխարհի առաջնության եզրափակիչում 0:1 հաշվով զիջեց Իսպանիային:

«Լիոնել Մեսսիի հետ նախնական համաձայնություն է ձեռք բերվել այն բաժնետոմսերի ձեռքբերման շուրջ, որոնք ներկայումս պատկանում են Grupo TH Soluciones-ին, ինչը նրան կդարձնի ակումբի մաժորիտար բաժնետերը»,- ասված է «Էլդենսեի» հաղորդագրության մեջ,- «Գործարքն այժմ կախված է մնացած իրավական և պայմանագրային ընթացակարգերի ավարտից, ներառյալ համալիր ստուգման գործընթացը, ինչպես նաև Իսպանիայի Սպորտի ազգային խորհրդից (CSD) անհրաժեշտ թույլտվության ստացումից»:

Ալիկանտեի ակումբն այս մրցաշրջանի չորս խաղում վաստակել է երկու միավոր և, Լա Լիգա 2-ում զբաղեցնելով 20-րդ տեղը, այս շաբաթվա սկզբին հեռացրել է գլխավոր մարզիչ Կլաուդիո Բարագանին:

«Կորնելյան» հանդես է գալիս իսպանական ֆուտբոլի հինգերորդ դիվիզիոնում, և ապրիլին հայտարարել էր, որ Մեսսիի կողմից ակումբի ձեռքբերումը «ամրապնդում է նրա սերտ կապերը «Բարսելոնայի» հետ և նրա հանձնառությունը Սպորտի ու Կատալոնիայում տեղական տաղանդների զարգացմանը»: