Մի շարք բենզալցակայաններում այսօր նկատվել է բենզինի գնի շուրջ 30 դրամով թանկացում
Մի շարք բենզալցակայաններում այսօր վարորդները նկատել են բենզինի գնի շուրջ 30 դրամով թանկացում։ Radar Armenia-ի հետ զրույցում տնտեսագետ Կարեն Սարգսյանը շեշտեց, որ բենզինի թանկացման հիմնական պատճառը նավթի միջազգային գների աճն է։
«Գնաճի պատճառը հիմնականում նավթի գներից է, քանի որ դրանցից է կախված բենզինի գինը։ Իհարկե, ոչ ամբողջությամբ, սակայն իրականում նավթի գնի փոփոխությունը բերում է նաև նավթից ստացվող այլ տեսակ վառելիքի գների թանկացման։ Նավթի շուկայում տեսնում ենք՝ ինչ է կատարվում այս վերջին շրջանում, բավական բարձրացել են միջազգային գները, և, ըստ այդմ, նաև բենզինն է դրան արձագանքում»,- ասաց տնտեսագետը։
Նրա խոսքով՝ գնային իրավիճակի վրա ազդում է նաև ռուսական շուկայում առկա դեֆիցիտը։ Միաժամանակ նա նշեց, որ Հայաստանը վերջին շրջանում դիվերսիֆիկացրել է ներմուծման աղբյուրները։
«Ռուսական շուկայում առկա դեֆիցիտը ևս իր ազդեցությունն ունի։ Իհարկե, Հայաստանը դիվերսիֆիկացրել է իր ներմուծումները՝ նաև այլ երկրներից, սակայն այս պահին կարող ենք ասել, որ միջազգային շուկայում ևս գներն աճել են։ Բենզինի գինը կախված է նավթի գներից, հետևաբար, եթե Ռուսաստանից ներմուծումը դժվարացել է, քանի որ Ռուսաստանը վառելիքը հիմնականում ներքին սպառման համար է բաց թողնում, միևնույն է, գները բարձրացել են»,- նշեց Սարգսյանը։
Նա անդրադարձավ նաև Ռուսաստանի նավթավերամշակման գործարանների աշխատանքին՝ նշելով, որ ուկրաինական հարձակումների հետևանքով դրանց գործունեության խափանումը համաշխարհային շուկայում ընդհանուր գնի վրա էապես չի ազդել, մինչդեռ նավթի միջազգային գների աճն էական ազդեցություն է ունեցել։ Խոսելով գնի հնարավոր նվազմանը՝ Կարեն Սարգսյանը շեշտեց, որ նավթի գինը տատանողական է, և կարճաժամկետ հեռանկարում գնի նվազման հստակ կանխատեսում անել չի կարող։
«Նավթի գինը տատանողական է, ինչպես նաև նավթից ստացվող այլ ապրանքների և էներգակիրների գները։ Հետևաբար մենք ականատես ենք եղել, թե ինչպես, օրինակ, մի քանի ամիս առաջ՝ նույն տարվա ընթացքում, նավթի գինը բավական մեծ չափով նվազեց։ Այս փուլում արագ փոփոխություն ակնկալելու կամ որևէ կանխատեսում անելու հնարավորություն չունեմ, սակայն նավթի գինը ամեն օր փոխվում է՝ կախված նաև Մերձավոր Արևելքում տեղի ունեցող զարգացումներից»,- նշեց նա։
Սարգսյանի խոսքով՝ բենզինի գնի թանկացումը կարճաժամկետ հեռանկարում, ամենայն հավանականությամբ, չի անդրադառնա հեղուկ գազի շուկայի վրա։ Նա հավելեց, որ հեղուկ գազն արդեն իսկ բավական թանկ է Հայաստանում, և հնարավոր է՝ դրա գինը փոքր չափով բարձրանա։
«Այսինքն՝ գինը չէր նվազում՝ 220-230, արդեն բարձր է։ Դրանից հավելյալ, ես կարծում եմ, որ շատ քիչ չափով միգուցե կբարձրանա, բայց ոչ շատ բարձր»,- շեշտեց տնտեսագետը։
Նրա պնդմամբ՝ եթե բենզինի թանկացումը երկարաժամկետ բնույթ կրի, այն կարող է անդրադառնալ նաև այլ ապրանքների գների վրա։
«Սպառողների համար սա, իհարկե, եթե երկարաժամկետ հատվածում սա քննարկենք, կբերի նաև որոշակի այլ ապրանքների գների բարձրացման, քանի որ էներգակիրները ցանկացած ապրանքի գնի հիմքում են։ Օրինակ՝ միգուցե նաև տրանսպորտի, եթե սա երկար շարունակվի։ Եթե կարճաժամկետ հատվածում դիտարկենք, ապա ամեն ինչ կախված է ընդհանուր զարգացումներից»,- հավաստիացրեց նա։
Աշխարհի ամենահայտնի Խորհրդարանական ծեծկռտուքները (ֆոտոշարք)
Գերմանիայում խաղաղ երթերը վերածվել են անկարգությունների, վանդալիզմի և խանութների թալանի
Ապարանից մինչև Սպիտակի ոլորաններ կատարվում են գծանշման աշխատանքներ․ հնարավոր են երթևեկության սահմանա...
Անցում զենքի պարզ մատակարարումից դեպի ավելի խորը ռազմատեխնիկական փոխգործակցություն
Երեք ծառայողի նկատմամբ կիրառվել է Ծառայության դադարեցում կարգապահական տույժը (տեսանյութ)
Եվրահանձնաժողովն իր աջակցությունն է հայտնել Լեհաստանի վարչապետին
Ռուսական դիզելային վառելիք տեղափոխող երեք լցանավի կարգելվի մուտք գործել Նյու Ջերսիի նավահանգիստ
Էլեկտրաէներգիայի ընդհատումներ կլինեն Երևանի և մարզերի բազմաթիվ հասցեներում
Նեթանյահուն Թրամփին հորդորում է հարվածել Իրանին ԱՄՆ միջանկյալ ընտրություններից անմիջապես հետո
Իսպանիայի Տեներիֆե–Անդորրա հանդիպումն ավարտվել է սարսափելի միջադեպով (տեսանյութ)