Հորմուզի նեղուցից դուրս կսահմանվի սահմանափակ մուտքով գոտի

Իրանը հայտարարել է, որ կուժեղացնի ջանքերը՝ ԱՄՆ-ի պատժամիջոցների հետևանքով առաջացած տնտեսական խնդիրները հաղթահարելու և երկրի տնտեսությունը կաթվածահարելու նպատակով կիրառվող ճնշմանը դիմակայելու համար։ Իրանի Ազգային անվտանգության գերագույն խորհրդի քարտուղար Մոհսեն Ռեզային կիրակի հայտարարել է, որ առաջիկա օրերին Հորմուզի նեղուցից դուրս կսահմանվի սահմանափակ մուտքով գոտի։

Նրա խոսքով՝ այդ գոտին կընդգրկի նաև Պարսից ծոցի որոշ հատվածներ։ Սկզբնական փուլում նախաձեռնության վերաբերյալ մանրամասներ չեն ներկայացվել, սակայն Ռեզային նշել է, որ նոր սահմանափակ մուտքով գոտի մտնող ցանկացած նավ կներառվի պատժամիջոցների ցանկում։

Ավելի վաղ Իրանի խորհրդարանի խոսնակ Մոհամմադ Բաղեր Ղալիբաֆը կիրակի հայտարարել է, որ ԱՄՆ-ը պետք է հասկանա՝ «խաղի կանոնները փոխվել են, քանի դեռ ուշ չէ». «Այսուհետ Իրանի շահերի և անվտանգության դեմ ցանկացած հարձակում կարժանանա ավելի արագ, ավելի կոշտ և ավելի ցավոտ պատասխանի»։

Նշենք, որ ԱՄՆ-ի և Իսրայելի հարվածներից վեց ամիս անց հակամարտությունը, կարծես, հայտնվել է փակուղում։ Հունիսին ձեռք բերված նախնական հրադադարի պայմանավորվածությունը խախտվել է, իսկ խաղաղ գործընթացը վերսկսելու ուղղությամբ դիվանագիտական ջանքերում մինչ այժմ էական առաջընթաց չի գրանցվել։

Օգոստոսի մեծ մասում ռազմական գործողությունների դադարից հետո կողմերի միջև «փոխադարձ» հարվածները վերսկսվել են։ ԱՄՆ Կենտրոնական հրամանատարության հաղորդմամբ՝ շաբաթ օրը ամերիկյան ուժերը հարվածներ են հասցրել իրանական երեք տանկերի, այն բանից հետո, երբ Իրանի Իսլամական հեղափոխության պահապանների կորպուսը բալիստիկ հրթիռներ է արձակել ԱՄՆ Ռազմածովային ուժերի երկու նավերի ուղղությամբ։