Ժաննա Անդրեասյանը հանդիպել է Ղրղզստանի գիտության, բարձրագույն կրթության և նորարարությունների նախարարի հետ

ՀՀ վարչապետ Նիկոլ Փաշինյանը գլխավորած պատվիրակության կազմում Ղրղզստանի Հանրապետությունում գտնվող ԿԳՄՍ նախարար Ժաննա Անդրեասյանն այսօր հանդիպել է Ղրղզստանի գիտության, բարձրագույն կրթության և նորարարությունների նախարար Գուլզատ Իսամատովայի հետ։

Հանդիպման ընթացքում քննարկվել են բարձրագույն կրթության, գիտության և նորարարության ոլորտներում երկու երկրների միջև համագործակցության ընդլայնման և գործնական կապերի զարգացման հնարավորությունները։

Կողմերն անդրադարձել են դասախոսների ու երիտասարդ հետազոտողների ակադեմիական շարժունության խթանմանը, ինչպես նաև փոխադարձ կրթաթոշակային և ուսանողական փոխանակման ծրագրերի իրականացմանն առնչվող հարցերի։

Գիտության և նորարարության ոլորտում կարևորվել է համատեղ հետազոտական նախագծերի իրականացումը։ Որպես համագործակցության հեռանկարային ուղղություններ՝ առանձնացվել են արհեստական բանականությունն ու թվային տեխնոլոգիաները, ճարտարագիտությունը, կենսատեխնոլոգիաները, ջրային ռեսուրսների կառավարումը, կլիմայի փոփոխությունը և գյուղատնտեսական տեխնոլոգիաները։

ԿԳՄՍ նախարար Ժաննա Անդրեասյանը ներկայացրել է  «Ակադեմիական քաղաք» ծրագիրը՝ ընդգծելով, որ ակադեմիական քաղաքի գաղափարը ենթադրում է ոչ միայն նոր ենթակառուցվածքների ստեղծում, այլև բարձրագույն կրթության, գիտության, հետազոտության, նորարարության և տնտեսության միջև ավելի սերտ կապերի ձևավորում։

Առանձին անդրադարձ է եղել բարձրագույն կրթության ոլորտում արհեստական բանականության կիրառմանը։ Քննարկվել են բուհերում ԱԲ դասավանդմանը, ակադեմիական ազնվությանը և ազատություններին, ուսանողների և դասախոսների կարողությունների զարգացմանն առնչվող հարցեր՝ այս համատեքստում  կարևորելով երկու երկրների բուհերի ու տեխնոլոգիական կազմակերպությունների ներգրավմամբ փորձի փոխանակումը։

Հանդիպման ավարտին կողմերը պատրաստակամություն են հայտնել համատեղ ջանքեր գործադրելու երկկողմ համագործակցության հետագա խորացման և կրթության, գիտության ու նորարարության ոլորտներում համատեղ նոր նախաձեռնությունների առաջմղման ուղղությամբ։