Մոլդովայում հոբելյանական 25-րդ Գինու ազգային օրվա միջոցառումները տեղի կունենան 2026 թ. հոկտեմբերի 3-4-ը. Moldpres

Մոլդովայում հոբելյանական 25-րդ Գինու ազգային օրվա միջոցառումները տեղի կունենան 2026 թվականի հոկտեմբերի 3-ին և 4-ին Քիշնևի Մեծ Ազգային ժողովի հրապարակում: «Արմենպրես»-ի փոխանցմամբ՝ այս մասին հաղորդում է Moldpres գործակալությունը։

Խաղողի և գինու ազգային գրասենյակի (ONVV) փոխանցմամբ՝ միջոցառումը ամբողջ երկրից և արտասահմանից կմիավորի ավելի քան 100 գինեգործների և տասնյակ հազարավոր այցելուների։

Միջոցառումը կազմակերպվում է Խաղողի և գինու ազգային գրասենյակի կողմից՝ Գյուղատնտեսության և սննդի արդյունաբերության, ինչպես նաև Մշակույթի նախարարությունների հետ համատեղ: Կազմակերպիչները խոստանում են հոբելյանական միջոցառում, որը նվիրված կլինի մոլդովական գինուն, այն արտադրող մարդկանց, ինչպես նաև գինու զարգացման և գինեգործության ավանդույթներին, որոնք դարձել են Մոլդովայի Հանրապետության ամենաճանաչելի այցեքարտերից մեկը:

«Երկու օրվա ընթացքում այցելուները կկարողանան բացահայտել նոր գինիներ, սահմանափակ քանակությամբ արտադրված գինիներ և հայտնի արտադրանք, ինչպես նաև անմիջականորեն զրուցել գինեգործների հետ՝ շշերի հետևում կանգնած պատմություններին ծանոթանալու համար:

Ծրագրի հիմնական մասը կլինի Գինու դպրոցը, որտեղ մասնակիցները կարող են մասնակցել վկայագրված սոմելիեների կողմից վարվող վարպետության դասերին և ավելին իմանալ խաղողի տեսակների, համտեսի տեխնիկայի և գինու՝ ավանդական ուտեստների հետ համադրման մասին:

Միջոցառումը կներառի հանգստի գոտիներ, ինտերակտիվ փորձառություններ և գաստրոնոմիկ առաջարկներ, որոնք նախատեսված են մոլդովական գինիներն ավանդական խոհանոցի հետ համադրելու միջոցով ընդգծելու համար», - պարզաբանել է ONVV-ն:

Ավելի քան 25 տարվա ընթացքում Գինու ազգային օրը վերածվել է տարածաշրջանի՝ գինուն նվիրված ամենակարևոր միջոցառումներից մեկի, որն ամեն տարի ներգրավում է տասնյակ հազարավոր մարդկանց։

Այս տարվա միջոցառումը նաև առանձնահատուկ նշանակություն ունի՝ նպատակ ունենալով խթանել «Մոլդովայի գինի» ապրանքանիշը և տեղական գինու արտադրության բազմազանությունը։

Գինու ազգային օրն առաջին անգամ կազմակերպվել է 2002 թվականին՝ իշխանությունների նախաձեռնությամբ և նախագահական գրասենյակի հովանու ներքո։