Ռանոսի վնասվածքը կարող է լուրջ հարված լինել նաև Հայաստանի ազգային հավաքականի համար

Հայաստանի ազգային հավաքականի հարձակվող Հրանտ-Լեոն Ռանոսի պաշտոնական նորամուտը իսպանական «Տեներիֆեի» կազմում այդպես էլ չկայացավ Սեգունդայի մեկնարկային տուրերում։ Մկանային խնդիրների պատճառով հայ ֆուտբոլիստը ստիպված եղավ բաց թողնել երկրորդ տուրի՝ «Ալմերիայի» դեմ կայացած հանդիպումը (1-0):

Ինչպես հայտնում են իսպանական AS Fútbol-ը և տեղական այլ պարբերականներ, Ռանոսին արդեն տևական ժամանակ՝ ամռան սկզբից, անհանգստացնում են նաև կոճի հետ կապված խնդիրները։ Թեև առաջնության առաջին տուրում նա հայտավորված էր և խաղին հետևում էր պահեստայինների նստարանից, մկանային ցավերի կրկնվելուց հետո բժշկական անձնակազմը որոշել է ռիսկի չդիմել: Ֆուտբոլիստը ժամանակավորապես դադարեցրել է մարզումները՝ լիարժեք ապաքինվելու համար:

Նախնական տեղեկություններով՝ վնասվածքի վերականգնողական փուլը կարող է տևել մի քանի շաբաթ: Սա նշանակում է, որ Ռանոսը մեծ հավանականությամբ բաց կթողնի ակումբի առաջիկա ևս մի քանի հանդիպումները Սեգունդայում։ Ռանոսի վնասվածքը կարող է լուրջ հարված լինել նաև Հայաստանի ազգային հավաքականի համար: Սեպտեմբերին կայանալիք հանդիպումներից առաջ հարձակվողի մասնակցությունն այս պահին մնում է հարցականի տակ:

Հիշեցնենք, որ Ազգերի լիգայի 2026/27 մրցաշրջանում Հայաստանի ազգային հավաքականն ընդգրկված է C լիգայի 2-րդ խմբում և մրցելու է Չեռնոգորիայի, Կիպրոսի ու Լատվիայի հավաքականների հետ։ Արդեն սեպտեմբերին մեր ընտրանին կանցկացնի երկու տնային հանդիպում. սեպտեմբերի 25-ին՝ ժամը 20:00-ին, կընդունի Լատվիային, իսկ սեպտեմբերի 28-ին՝ նույն ժամին, կմրցի Չեռնոգորիայի հետ:

23-ամյա խաղացողը իսպանական ակումբին միացել է ընթացիկ ամառային տրանսֆերային պատուհանի ընթացքում, սակայն մինչ այս դեռևս որևէ պաշտոնական խաղի չի մասնակցել նոր թիմի կազմում։