Հյուրընկալության ոլորտի միջազգային բրենդները մուտք կգործեն Հայաստան. Parvanyan Group-ը և SHBA-ն հայտարարել են ռազմավարական գործընկերության մասին

Parvanyan Group-ը և Swiss Hospitality Business Advisory-ը (SHBA) հայտարարել են ռազմավարական գործընկերության համաձայնագրի ստորագրման մասին։

Այս գործընկերությունը միավորում է միմյանց լրացնող երկու ուժեղ կողմ՝ Հայաստանում և տարածաշրջանում Parvanyan Group-ի 12-ամյա հարուստ փորձն ու ամուր ինստիտուցիոնալ ներկայությունը և SHBA-ի՝ հյուրընկալության ոլորտում միջազգային չափանիշները, եվրոպական գործընկերային ցանցն ու մասնագիտացված խորհրդատվական կարողությունները։ Համագործակցությունն ամբողջանում է  հյուրընկալության ոլորտում աշխարհի առաջատար կրթական հաստատության՝ EHL Advisory-ի հետ գործակցությամբ և ոլորտի առաջատար մասնագետներից կազմված միջազգային խորհրդատվական խորհրդի ներգրավվածությամբ։

«Միավորելով մեր կարողությունները՝ մենք ստեղծում ենք այնպիսի հնարավորություններ, որոնք կազմակերպություններից յուրաքանչյուրն առանձին չէր կարող ապահովել։

· Միջազգային բրենդների և լյուքս դասի հայեցակարգերի մուտք Հայաստան և Կովկաս՝ ամբողջական աջակցությամբ՝ շուկա մուտք գործելու ռազմավարության մշակումից և ֆրանշիզային գործունեության զարգացումից մինչև գործառնական մեկնարկ և որակի չափանիշների ներդրում։

· Հայաստանի և տարածաշրջանի հյուրընկալության ոլորտի ընկերությունների միջազգային ընդլայնում՝ եվրոպական գործընկերային ցանցերի, ղեկավարների համար նախատեսված կրթական ծրագրերի և ոլորտի միջազգային կապերի աջակցությամբ։

· Ներդրողների, կառուցապատողների, հյուրանոցների սեփականատերերի և հյուրընկալության ոլորտի բրենդների համար ծառայությունների ամբողջական էկոհամակարգի հասանելիություն՝ ռազմավարական խորհրդատվություն, ներդրումների կառուցվածքավորում, ղեկավարների կրթություն և մասնագիտական վերապատրաստում, հյուրընկալության ոլորտի տեխնոլոգիաներ, սննդի անվտանգության համակարգեր և համաշխարհային մակարդակի գործառնական չափանիշներ։ Այս ամենը՝ մեկ միասնական ռազմավարական հարթակի ներքո։

· Հյուրընկալության ոլորտի զարգացման համալիր ծրագրերի մշակում և իրականացում՝ ցանկացած մասշտաբով՝ առանձին օբյեկտից կամ ընկերությունների խմբից մինչև տարածաշրջանային կամ պետական ծրագիր։

Սա միանման ընկերությունների գործընկերություն չէ։ Այն միմյանց լրացնող ուժեղ կողմերի միավորում է, որի նպատակն է աջակցել հաճախորդներին հյուրընկալության ոլորտում իրենց զարգացման յուրաքանչյուր փուլում և նոր նշաձող սահմանել Հայաստանում ու տարածաշրջանում ոլորտի հնարավորությունների համար։

Մենք անհամբերությամբ սպասում ենք միասին բացառիկ ուղղություններ ստեղծելուն»,-նշում են գործընկեր կառույցները։

Parvanyan Group-ի մասին

2013 թվականին Մհեր Փարվանյանի հիմնադրած Parvanyan Group-ը Հայաստանի առաջատար բիզնես խորհրդատվական և ներդրումային խմբերից է։ Խմբի կազմում են Parvanyan Consulting-ը, Longvest Investment Fund-ը, BIZ4SALE-ը և Archizone-ը։

Ավելի քան 60 մասնագետից բաղկացած թիմով խումբը սպասարկում է ավելի քան 350 հաճախորդի Հայաստանում, Եվրոպայում և Միացյալ Նահանգներում։ Parvanyan Group-ը նշանակալի դեր է ունեցել համաշխարհային ճանաչում ունեցող լյուքս դասի բրենդները հայկական շուկա բերելու գործում։

Swiss Hospitality Business Advisory-ի (SHBA) մասին

Հայաստանում գրանցված և միջազգային շուկայում գործող SHBA-ն հյուրընկալության ոլորտում մասնագիտացած խորհրդատվական ընկերություն է, որը համագործակցում է EHL Advisory-ի հետ՝ հյուրընկալության ոլորտի աշխարհի առաջատար կրթական հաստատության խորհրդատվական կառույցի։ Ընկերության գործունեությանն աջակցում է նաև ոլորտի առաջատար մասնագետներից կազմված միջազգային խորհրդատվական խորհուրդը, որը միավորում է Michelin Guide-ի նախկին ղեկավար կազմի ներկայացուցիչների, Michelin Key հյուրանոցների ոլորտի փորձագետների, Ֆրանսիայի «Meilleur Ouvrier de France» («Ֆրանսիայի լավագույն վարպետ») բարձր կոչմանն արժանացած խոհարարական ոլորտի մասնագետների, ինչպես նաև առաջատար հյուրանոցների մի շարք գլխավոր տնօրենների։

SHBA-ն առաջնորդվում է «Ոլորտի համար՝ ոլորտի մասնագետների կողմից» («For the Industry, By the Industry») սկզբունքով։

Ընկերությունը մասնագիտացած է ղեկավարների կրթության և մասնագիտական վերապատրաստման, հյուրընկալության ոլորտի «փափուկ» ենթակառուցվածքների զարգացման, սննդի անվտանգության և որակի համակարգերի, հյուրընկալության տեխնոլոգիաների, ինչպես նաև առանձին օբյեկտների, ընկերությունների խմբերի, տարածաշրջանների և պետական ծրագրերի մակարդակով հյուրընկալության ոլորտի զարգացման համալիր նախագծերի մշակման ու իրականացման ուղղություններով։

Արմենպրես