Հարի Քեյնի կարիերայում սա արդեն երկրորդ «Ոսկե խաղակոշիկն» է

Մյունխենի «Բավարիայի» և Անգլիայի ազգային հավաքականի 33-ամյա հարձակվող Հարի Քեյնը ստացել է 2025/26 մրցաշրջանի «Ոսկե խաղակոշիկը»: Հանդիսավոր արարողությունը կայացել է չորեքշաբթի՝ օգոստոսի 19-ին, մյունխենյան ակումբի թանգարանում:

Նախորդ մրցաշրջանում անգլիացի հարձակվողը Բունդեսլիգայի 31 խաղում դարձել է 36 գոլի հեղինակ։ Այս տպավորիչ արդյունքը թույլ տվեց Քեյնին վաստակել 72 միավոր և ճանաչվել Եվրոպական ազգային առաջնությունների լավագույն ռմբարկու՝ վստահորեն շրջանցելով մոտակա հետապնդողներին՝ Էրլինգ Հալանդին («Մանչեսթեր Սիթի», 54 միավոր) և Կիլիան Մբապեին («Ռեալ Մադրիդ», 50 միավոր): Քեյնի ֆենոմենալ կայունությունն ու արդյունավետությունն օգնեցին «Բավարիային» վաստակել 89 միավոր 34 խաղում և հռչակվել Գերմանիայի չեմպիոն:

Սա Քեյնի կարիերայում արդեն երկրորդ «Ոսկե խաղակոշիկն» է: Առաջինը նա նվաճել էր մյունխենյան ակումբում իր նորամուտի՝ 2023/24 մրցաշրջանում (կրկին խփելով 36 գոլ): Անգլիացին դարձավ ֆուտբոլի պատմության մեջ տասներորդ խաղացողը, որին հաջողվել է երկու անգամ նվաճել այս հեղինակավոր մրցանակը: Հիշեցնենք, որ «Ոսկե խաղակոշիկների» քանակով բացարձակ ռեկորդակիրը Լիոնել Մեսսին է (արժանացել է 6 անգամ):

Մրցանակաբաշխության հատուկ հյուրերից էր «Բավարիայի» նախկին հարձակվող Լուկա Տոնին, ով բեմից դիմելով անգլիացուն՝ կատակել է. «Դու արժանի ես «Ոսկե գնդակին»։ Խնդրում եմ, դադարիր գերազանցել մեր բոլոր ռեկորդները»։

Իր հերթին, Քեյնը շնորհակալություն է հայտնել թիմակիցներին և մարզչական շտաբին՝ ընդգծելով, որ իր անհատական հաջողություններն անքակտելիորեն կապված են թիմային աշխատանքի հետ: Հարձակվողը նաև հավելել է, որ չի պատրաստվում բավարարվել ձեռքբերվածով և նոր մրցաշրջանում թիրախավորում է նոր տիտղոսներ:

Հարի Քեյնը «Բավարիայում» հանդես է գալիս 2023 թվականից։ Այս ընթացքում նա ակումբի հետ երկու անգամ հաղթել է Գերմանիայի առաջնությունը, ինչպես նաև մեկական անգամ նվաճել երկրի Գավաթն ու Սուպերգավաթը:

Նոր՝ 2026/27 մրցաշրջանի առաջին հանդիպումը «Բավարիան» կանցկացնի շաբաթ օրը՝ օգոստոսի 22-ին՝ Գերմանիայի Սուպերգավաթի խաղարկությունում մրցելով Դորտմունդի «Բորուսիայի» դեմ:

armsport.am