Զբոսաշրջության ոլորտում նոր կարգավորումներ․ գործունեություն իրականացնողները կգրանցվեն միասնական տվյալների շտեմարանում

Հայաստանում զբոսաշրջության ոլորտում գործունեություն իրականացնողների հաշվառման և վերահսկողության նոր համակարգ է ներդրվում։ Նոր կարգավորումների շրջանակում ոլորտի ծառայություն մատուցողները պետք է նույնականացվեն, գրանցվեն միասնական տվյալների շտեմարանում և պարբերաբար թարմացնեն իրենց գործունեության վերաբերյալ տեղեկությունները։ Այս մասին ասուլիսի ժամանակ ներկայացրել է ՀՀ էկոնոմիկայի նախարարության Զբոսաշրջության կոմիտեի զբոսաշրջության քաղաքականության վարչության պետ Անահիտ Մկրտչյանը։

Նոր տվյալների շտեմարանը հասանելի կլինի հոկտեմբերի 15-ից՝ Notify Tourism gov․am կայքի միջոցով։ Համակարգի գործարկումից հետո զբոսաշրջության ոլորտում գործունեություն իրականացնողներին փուլային եղանակով կծանուցվի գրանցման և անհրաժեշտ տվյալների ներկայացման մասին։

Շտեմարանի նպատակն է մեկ համակարգում հավաքագրել զբոսաշրջության ոլորտում գործունեություն իրականացնող անձանց և կազմակերպությունների վերաբերյալ ամբողջական տեղեկատվությունը։ Այսինքն՝ համակարգում պետք է հնարավոր լինի տեսնել, թե տվյալ ծառայություն մատուցողն ինչ գործունեություն է իրականացնում և ինչ ծավալով։

Օրինակ՝ կացության ծառայություններ մատուցողները համակարգում պարտադիր պետք է ներկայացնեն իրենց գործունեությանը վերաբերող տվյալներ՝ այդ թվում ննջասենյակների, մահճակալների և այլ ծառայությունների մասին։ Եթե նախկինում որոշ տեղեկություններ ներկայացվում էին ծառայություն մատուցողի կողմից, ապա նոր կարգավորումներով այդ տվյալների լրացումը պարտադիր է դառնում։

Միաժամանակ նախատեսվում է խուսափել նույն տեղեկությունը տարբեր համակարգերում կրկին մուտքագրելու անհրաժեշտությունից։ Եթե զբոսաշրջության ոլորտում գործունեություն իրականացնողի վերաբերյալ տվյալներն արդեն առկա են մեկ այլ շտեմարանում, դրանք հնարավոր կլինի ամբողջությամբ տեղափոխել նոր համակարգ։

Նոր համակարգի ստեղծման անհրաժեշտությունը, ըստ Զբոսաշրջության կոմիտեի, պայմանավորված է նաև ոլորտում չգրանցված կամ իրենց գործունեությունն ամբողջությամբ չներկայացնող ծառայություն մատուցողների առկայությամբ և նրանց գործունեության վերաբերյալ ստացվող բողոքներով։

Նպատակն է ոլորտում գործունեություն իրականացնողների համար ստեղծել ավելի հստակ կարգավորող և զսպող մեխանիզմներ, որոնք կնպաստեն զբոսաշրջային ծառայությունների որակի բարձրացմանը և ոլորտի նկատմամբ վերահսկողության ուժեղացմանը։

Համակարգի ներդրմամբ ծառայություն մատուցողները պարտավոր են նաև պարբերաբար թարմացնել իրենց գործունեության վերաբերյալ տվյալները։ Սահմանված տեղեկությունները չներկայացնելու դեպքում համապատասխան ծառայություն մատուցողները կհայտնվեն վերահսկողության շրջանակում։ Այս ուղղությամբ Պետական եկամուտների կոմիտեն կիրականացնի հետևողական աշխատանք՝ օրենսդրությամբ սահմանված կարգով։

Փոփոխությունները վերաբերում են նաև զբոսավարներին և ուղեկցորդներին։ Նոր կարգավորումների համաձայն՝ նրանք երեք տարին մեկ պետք է անցնեն վերապատրաստում։ Վերապատրաստման նպատակներից մեկն էլ զբոսաշրջիկներին փոխանցվող տեղեկատվության որակի նկատմամբ վերահսկողության բարձրացումն է։ Այսպիսով, ոլորտի մասնագետներից ակնկալվում է ոչ միայն զբոսաշրջային ծառայությունների մատուցում, այլև զբոսաշրջիկներին տրամադրվող տեղեկատվության պատշաճ որակի ապահովում։

Նոր կարգավորումների արդյունքում նախատեսվում է ունենալ զբոսաշրջության ոլորտի գործունեություն իրականացնողների վերաբերյալ ավելի ամբողջական և համակարգված տեղեկատվություն, հստակեցնել նրանց գործունեության հաշվառումը և ուժեղացնել ոլորտի վերահսկողության մեխանիզմները։

Շողեր Ղլիջյան