Մոսկվան ենթարկվել է վերջին երկու տարվա մեջ ամենախոշոր հարվածին

Երեկ երկոյից մինչեւ այսօր առավոտ Մոսկվան ենթարկվել է 620 ԱԹՍ-ների հարվածի, հայտարարել է քաղաքի քաղաքապետ Սերգեյ Սոբյանինը։ 180 անօդաչու սարք ոչնչացվել է մայրաքաղաքի շրջանում, գրել է նա Telegram-ում։ Անօդաչու սարքերի բեկորների ընկնելու վայրերում աշխատում են արտակարգ ծառայությունները, հավելել է քաղաքապետը։

Մայրաքաղաքի վրա հարձակման հետեւանքների մասին քաղաքապետը չի հայտնել։ ՏԱՍՍ-ի տվյալներով՝ այս հարձակումը վերջին երկու տարվա ընթացքում ամենախոշորն է եղել։

Գիշերը Մոսկվայում դադարեցվել է Վնուկովո, Դոմոդեդովո եւ Ժուկովսկի օդանավակայանների աշխատանքը։ Շերեմետեւոյի համար սահմանվել են մասնակի սահմանափակումներ. այն ընդունում եւ ուղարկում է ինքնաթիռներ՝ «համապատասխան մարմինների» հետ համաձայնեցումից հետո, հայտնել են «Ռոսավիացիայում»։ Սահմանափակումները մինչ այժմ գործում են։

Նոգինսկի մոտ գտնվող «Անտանտ-պարկ» պահեստային համալիրի տարածքում հարձակման է ենթարկվել Wildberries-ի պահեստը։ Նահանգապետ Անդրեյ Վորոբյովի տեղեկություններով՝ հարվածից հետո հրդեհ է բռնկվել, որը հրշեջներն արդեն տեղայնացրել են։

Կոլոմնայում անօդաչու սարքի բեկորների պատճառով «Գլոբուս» առեւտրի կենտրոնի շրջանում հրդեհ է բռնկվել առեւտրային տաղավարում։ Քաղաքի Սովետական հրապարակում վնասվել են ԶԱԳՍ-ի շենքը, խանութը եւ բնակելի տան պատուհանները։

 Նահանգապետը հայտնել է երեք տուժածի մասին։ Նրանց թվում են 10-ամյա աղջիկը, որը մասնավոր տան վրա անօդաչու սարքի ընկնելու հետեւանքով ձեռքի վնասվածք է ստացել, 27-ամյա տղամարդը, որը վնասվածք է ստացել Կոլոմնայում, ինչպես նաեւ Բոգորոդսկի շրջանում մի կին։