Հայաստանի հավաքականը փայլուն արդյունքներ է գրանցել՝ գլխավորելով թիմային հաշվարկը

Հյուսիսային Մակեդոնիայի մայրաքաղաք Սկոպյեում ընթացող հունահռոմեական ոճի ըմբշամարտի Եվրոպայի մինչև 20 տարեկանների առաջնությունում Հայաստանի հավաքականը փայլուն արդյունքներ է գրանցել՝ գլխավորելով թիմային հաշվարկը։

Մրցաշարի իսկական հերոս դարձավ 77 կգ քաշային Սամվել Տերտերյանը, ով ֆանտաստիկ ճանապարհ անցավ դեպի չեմպիոնություն։ Հայ ըմբիշն ապացուցեց իր բացարձակ գերազանցությունը՝ մրցաշարի ողջ ընթացքում գոտեմարտելով անսխալ և մրցակիցներին չզիջելով ոչ մի միավոր։

Տերտերյանը մրցելույթներն սկսեց ավստրիացի Լարս Մատի նկատմամբ 9:0 հաշվով վստահ հաղթանակով։ Քառորդ եզրափակիչում նա նույն՝ 9:0 հաշվով ջախջախեց Մոլդովայի ներկայացուցիչ Նիկիտա Ապոստոլին։ Կիսաեզրափակիչում հայ ըմբիշի ճնշմանը չդիմացավ շվեդ Ռուբեն Ստրակևեդը (8:0)։ Վճռորոշ գոտեմարտում՝ չեմպիոնի կոչման համար, Տերտերյանն ուժերը չափեց Ադրբեջանի ներկայացուցիչ Ջավիդան Նահմաթովի հետ։ Հայ մարզիկն այստեղ ևս անվրեպ գործեց՝ հաղթելով 4:0 հաշվով և արժանիորեն նվաճելով ոսկե մեդալը։ Հատկանշական է, որ այս մրցաշրջանում Սամվելը հասցրել էր նաև արծաթե մեդալ նվաճել Մ23 տարեկանների Եվրոպայի առաջնությունում։

Հայաստանի հավաքականի մյուս արդյունքները առաջին եզրափակիչներից հետո.

Արծաթե մեդալակիրներ. 55 կգ քաշային Էդգար Պետրոսյանը և 63 կգ քաշային Ալեքս Մարգարյանը հասան մինչև եզրափակիչ և դարձան մրցաշարի փոխչեմպիոններ։

Բրոնզե մեդալակիր. 87 կգ քաշային Յուրիկ Պետրոսյանը 3-րդ տեղի համար գոտեմարտում 4:1 հաշվով առավելության հասավ ռումինացի Գաբրիել Ստանի նկատմամբ։

Այս նվաճումների շնորհիվ Հայաստանի հավաքականը վաստակել է 88 միավոր և այս պահին գլխավորում է թիմային աղյուսակը՝ առաջ անցնելով Ռուսաստանի (80 միավոր) և Ադրբեջանի (75 միավոր) հավաքականներից։

Բրոնզե մեդալի համար կպայքարի նաև 72 կգ քաշային Նարեկ Գրիգորյանը (նա կիսաեզրափակիչում զիջել էր թուրք ըմբիշին), իսկ Յուրիկ Մխիթարյանը (67 կգ) և Վահե Հովհաննիսյանը (82 կգ) հնարավորություն են ստացել իրենց ուժերը փորձել սփոփիչ գոտեմարտերում։