Կամո Ունանյանը վերադարձել է և նոր հաղթանակներ գրանցել

Կարատեի աշխարհի և Եվրոպայի բազմակի չեմպիոն, MMA-ի անպարտելի մարտիկ Կամո Ունանյանը ողնաշարի ծանր վիրահատությունից և տևական դադարից հետո փառահեղ վերադարձ է գրանցել մեծ սպորտ՝ կարճ ժամանակահատվածում նվաճելով երկու հեղինակավոր միջազգային տիտղոս, հայտնում են Հայաստանի կարատեի միությունից:

Հակառակ բժիշկների այն պնդումներին, թե ստացած վնասվածքների և վիրահատության պատճառով մարզիկը չի կարողանա շարունակել կարիերան, Ունանյանը դիմել է գիտակցված ռիսկի և վերսկսել մարզումները:

Վերադարձի արդյունքը եղել է հունիսի 5-ին Հունգարիայում կայացած առաջնությունում նրա տպավորիչ մասնակցությունը,  նա հռչակվել է կարատեի Շիտորյու վարկածով Եվրոպայի չեմպիոն:

Արդեն  հունիսի 20-21-ին Լեհաստանում, որտեղ անցկացվել է WKF վարկածով կարատեի միջազգային Գրան պրին, մի քանի տպավորիչ մենամարտերում հաղթանակներ տանելուց հետո դարձել է Գրան պրիի մրցանակակիր:

«Այո, ես դեմ գնացի բնությանը, ռիսկի դիմեցի, և, փառք Աստծո, ռիսկի գնալս տվեց իր արդյունքը՝ հաղթանակով ավարտվեց», - հաղթանակից հետո ասել է նա։

Հուլիսի վերջին Ռումինիայում նա կմասնակցի կարատեի WUKF վարկածով աշխարհի առաջնությանը, ինչպես նաև նախատեսում է հերթական մենամարտն անցկացնել MMA մարզաձևում, որտեղ ներկայումս ունի անպարտելի ռեկորդ՝ 8 հաղթանակ և ոչ մի պարտություն: