Լաուրա Ֆառե Ռոսադան ելույթ կունենա «Դաշնամուրային համերգաշար» նախագծի շրջանակում

Հայաստանի պետական ֆիլհարմոնիայի նախաձեռնությամբ մեկնարկել է «Դաշնամուրային համերգաշար» երաժշտական նախագիծը, որը նպատակ ունի միավորելու տարբեր երկրների ճանաչված դաշնակահարների՝ ստեղծելով միջազգային երաժշտական երկխոսության ինքնատիպ հարթակ Երևանում։

Դաշնամուրային համերգաշարի շրջանակում հանդիսատեսը հնարավորություն կունենա վայելելու համաշխարհային կատարողական արվեստը ներկայացնող անվանի մենակատարների մասնակցությամբ համերգային երեկոներ՝ հաղորդակցվելով դաշնամուրային արվեստի տարբեր դպրոցներին, ոճերին և երաժշտական մտածողություններին։

Լոնդոնի Թագավորական երաժշտական քոլեջի շրջանավարտ, դաշնակահարուհի և միևնույն ժամանակ մաթեմատիկոս Լաուրա Ֆառե Ռոսադան առանձնանում է տարբեր ոլորտների միջև մշակութային կապեր ստեղծելու իր բացառիկ ունակությամբ։

«Առասպել» խորագրով համերգային նախագիծն ու համանուն ալբոմը միավորում են դաշնակահարուհի Լաուրա Ֆառեի ավելի քան տասը տարվա հետազոտությունները, նվիրումն ու ստեղծագործական հանձնառությունը։ Ալբոմի վերնագիրն ինքնին հստակ ուղերձ է՝ բացահայտելու հայկական երաժշտության հնչյունային աշխարհը, որի հոգևոր և գեղագիտական հիմքը Կոմիտաս վարդապետի ստեղծագործական ժառանգությունն է։

«Առասպել» նախագծում նա անդրադառնում է Կոմիտասի առանցքային դերին հոգևոր ու ժողովրդական երաժշտության միաձուլման գործում՝ միաժամանակ ընդգծելով հայ կոմպոզիտորների կապը Ֆրանսիայի, Բուլղարիայի, Ռուսաստանի և Միացյալ Նահանգների ստեղծագործողների հետ։

Հունիսի 26-ին՝ ժամը 19:00-ին, Հայաստանի պետական ֆիլհարմոնիայի «Առնո Բաբաջանյան» համերգասրահում կայանալիք համերգին Լաուրա Ֆառեն հանդես կգա մենահամերգով։ Ծրագրում՝

Կոմիտաս՝ «Ես աղջիկ եմ», «Շուշիկի», «Ետ-առաջ» 7 պար շարքից
Դիմիտար Նենով՝ «Տոկատա»
Ալեքսանդր Սպենդիարյան՝ Էլեգիական երգ «Ղրիմյան պատկերներ» շարքից
Կլոդ Դեբյուսի՝ Պրելյուդ, Սարաբանդա և Տոկատա Pour le piano շարքից

Գայանե Չեբոտարյան՝ Պրելյուդ թիվ 6, Allegro, Պրելյուդ թիվ 4, Allegro grazioso, Պրելյուդ թիվ 1, Andante
Ալան Հովհաննես՝ Ժողովրդական երգ թիվ 12, «Խորհրդավոր սրինգ»
Առնո Բաբաջանյան՝ «Էքսպրոմտ»

Համերգի հաջորդ օրը՝ հունիսի 27-ին՝ ժամը 17:00-ին, դաշնակահարուհին կունենա դասախոսություն երաժշտության և մաթեմատիկայի մասին։

Երաժշտությունը մաթեմատիկայի ամենաինտուիտիվ դրսևորումներից մեկն է։ Սակայն, չնայած այս երկու գիտակարգերի միջև առկա կապերի հանդեպ աճող հետաքրքրությանը, դրանք հազվադեպ են ներկայացվում մանրամասն և հասկանալի կերպով։ Այս դասախոսության ընթացքում ներկաները հնարավորություն կունենան Լաուրա Ֆառե Ռոսադայի մեկնաբանությամբ բացահայտելու այդ զարմանահրաշ կապերից մի քանիսը՝ ուսումնասիրելով, թե ինչպես են երաժշտությունն ու մաթեմատիկան փոխլրացնում ու հարստացնում միմյանց։

Դասախոսության մուտքն ազատ է։