Երևանն ու Գյումրին կհյուրընկալեն կարճամետրաժ ֆիլմերի 9-րդ միջազգային կինոփառատոնը

Երևանն ու Գյումրին կհյուրընկալեն կարճամետրաժ ֆիլմերի 9-րդ միջազգային կինոփառատոնը․ ծրագրում առաջին անգամ ընդգրկվել են նաև AI-ով ստեղծված ֆիլմեր: Հունիսի 25-29-ը Երևանում և Գյումրիում կանցկացվի Երևանի կարճամետրաժ ֆիլմերի 9-րդ միջազգային կինոփառատոնը։ Միջազգային կինոմիջոցառումը, որը 2018 թվականին հիմնադրել է կինոռեժիսոր Գուժ Թադևոսյանը, տարիների ընթացքում դարձել է երիտասարդ կինոգործիչների ճանաչման և նոր կինոսերնդի ձևավորման կարևոր հարթակ։

Փառատոնի հանդիսավոր բացման արարողությունը տեղի կունենա հունիսի 25-ին՝ ժամը 19։00-ին, Կինոյի տան մեծ դահլիճում։ Բացման ֆիլմը կլինի իրանցի ռեժիսոր Սեյեդ Ալի Ղասեմի «Մշուշը վերացել է» ֆիլմը։ Մրցութային ցուցադրությունները կանցկացվեն ինչպես Երևանում, այնպես էլ Գյումրիում, իսկ փառատոնի փակման արարողությունը հունիսի 29-ին տեղի կունենա Գյումրու «Հոկտեմբեր» կինոթատրոնում։

Կազմակերպիչների խոսքով՝ Շիրակի մարզը վեցերորդ մարզն է, որը հյուրընկալում է կինոփառատոնը։ Նրանք ընդգծում են, որ փառատոնի անցկացումը մարզերում կարևոր հնարավորություն է կինոմշակույթն ավելի լայն շրջանակների հասցնելու և մշակութային կյանքի ակտիվացման համար։

Այս տարվա փառատոնն առանձնանում է ևս մեկ կարևոր նորությամբ. առաջին անգամ ծրագրում ընդգրկվել են արհեստական բանականության կիրառմամբ ստեղծված ֆիլմեր։ Կազմակերպիչների գնահատմամբ՝ սա արտացոլում է համաշխարհային կինոարտադրության նոր միտումները և հնարավորություն է տալիս քննարկելու տեխնոլոգիաների ազդեցությունը ժամանակակից արվեստի վրա։

Փառատոնի մրցութային ծրագիրը ներառում է միջազգային, ազգային և ուսանողական բաժիններ։ Միջազգային ծրագրում ներկայացված են խաղարկային կարճամետրաժ ֆիլմեր, ազգային ծրագրում՝ խաղարկային և վավերագրական կարճամետրաժ ֆիլմեր, իսկ ուսանողական ծրագրում՝ երիտասարդ հեղինակների խաղարկային և վավերագրական աշխատանքներ։

Այս տարի փառատոնը մեծ հետաքրքրություն է առաջացրել միջազգային կինոհանրության շրջանում։ Հայտեր են ստացվել աշխարհի 95 երկրներից։ Կազմակերպիչների համոզմամբ՝ այդ օրերին Երևանն ու Գյումրին կվերածվեն միջազգային կինոմշակութային կարևոր կենտրոնների։

Նշվում է նաև, որ նախորդ տարվա համեմատ ազգային հայտերի և ընտրված աշխատանքների թիվն աճել է, ինչը, ըստ կազմակերպիչների, վկայում է տեղական կինոարտադրության ակտիվ զարգացման և երիտասարդ հեղինակների հետաքրքրվածության մասին։

Փառատոնի շրջանակում կանցկացվեն նաև ստեղծագործական հանդիպումներ, վարպետության դասեր, կլոր սեղաններ, ֆիլմերի դիտում-քննարկումներ, շնորհանդեսներ և փորձի փոխանակման հարթակներ, որոնք հնարավորություն կտան կինոգործիչներին, ուսանողներին և ոլորտով հետաքրքրվողներին անմիջական շփում ունենալ միջազգային և հայ մասնագետների հետ։

Փառատոնի գլխավոր հովանավորն է Երևանի քաղաքապետարանը, որը 9-րդ միջազգային կինոփառատոնի անցկացման համար հատկացրել է 20 միլիոն դրամ։

Top-news.am