Ընկնելու պահը չի հայտնվել հեռուստատեսային հեռարձակման մեջ, սակայն ստուդիայում ծնողներից մեկի նկարահանած տեսանյութը տարածվել է սոցիալական ցանցերում։ Տեսագրության մեջ երևում է, թե ինչպես է աղջնակը կորցնում գիտակցությունը ելույթի մոտավորապես 50-րդ վայրկյանին։

Երեխայի մայրը՝ Թամար Ակոբիան, «Ազատություն» ռադիոկայանի վրացական ծառայությանը պատմել է, որ կատարվածի մասին իմացել է միայն հաղորդման տեսագրությունից հետո։ Նա նշել է, որ դստերը ստուդիայից դուրս են բերել գունատված և վախեցած։ Կինը խոստովանել է, որ ցնցված է եղել՝ ավելի ուշ տեսնելով միջադեպի տեսագրությունը։

«Նրանք երեխային մենակ են թողել դժբախտության մեջ։ Նա ինքնուրույն է ուշքի եկել՝ ցնցված ու սարսափած»,- հայտարարել է Ակոբիան։

Աղջնակը լուրջ վնասվածքներ չի ստացել և պրծել է թեթև սալջարդերով։ Ընտանիքը հայտնել է, որ բժշկական հետազոտությունից հետո կլքի «Երգի ակադեմիա» անսամբլը, քանի որ կորցրել է վստահությունը դրա ղեկավարության նկատմամբ։

Իրենց հերթին, նախագծի և հեռուստաալիքի ներկայացուցիչները հերքում են անտարբերության մասին մեղադրանքները։ «Երգի ակադեմիայի» համահիմնադիր Լևան Կուտատելաձեն հայտարարել է, որ բեմում երեխաների դասավորվածության պատճառով ոչ ոք չի նկատել ընկնելու պահը։ Ըստ նրա՝ եթե նկարահանման մասնակիցները տեսնեին անգիտակից ընկած երեխային, եթերն անմիջապես կդադարեցվեր։

Նմանատիպ պարզաբանմամբ հանդես է եկել նաև հաղորդավարուհի Լիզա Բագրատիոնին։ Նա նշել է, որ տեսագրությունից հետո չափահասները հետաքրքրվել են աղջնակի ինքնազգացողությամբ, իսկ նա պատասխանել է, որ իրեն լավ է զգում։

Վրաստանի Հանրային հեռարձակողը հայտնել է ներքին ստուգումների անցկացման մասին։ Հեռուստաալիքի տվյալներով՝ աշխատակիցներն իսկապես չեն նկատել եթերի ժամանակ կատարվածը։ Հայտարարության մեջ ընդգծվում է, որ նման իրավիճակների հայտնաբերման դեպքում հեռարձակումն անմիջապես ընդհատվում է երեխային օգնություն ցուցաբերելու համար։

«Երգի ակադեմիա» վոկալի դպրոցը ևս հայտարարել է, որ սոցիալական ցանցերում բախվել է քննադատության և վիրավորանքների մեծ ալիքի։ Հաստատության ներկայացուցիչները կոչ են արել հապճեպ եզրակացություններ չանել և չտարածել մեկնաբանություններ, որոնք, իրենց կարծիքով, չեն համապատասխանում իրականությանը։

Միջադեպը հանրային լայն քննարկումների տեղիք է տվել։ Ոմանք կատարվածը համարում են չափահասների անթույլատրելի անտարբերության դրսևորում, մյուսները համոզված են, որ պատճառը եղել է անփութությունը և հեռուստատեսային նկարահանման առանձնահատկությունները, որոնց պատճառով երեխայի ընկնելն աննկատ է մնացել։