Ուկրաինայի հակակոռուպցիոն գերատեսչությունները հայտարարել են կազմակերպված խմբի բացահայտման մասին

Ուկրաինայի հակակոռուպցիոն գերատեսչությունները հայտարարել են կազմակերպված խմբի բացահայտման մասին, որը ներգրավված է Կիևի մերձակայքում էլիտար բնակարանների շինարարության ընթացքում 10.5 միլիոն դոլարի օրինականացման (լվացման) մեջ: Կասկածյալներից մեկը Վլադիմիր Զելենսկու գրասենյակի նախկին ղեկավար Անդրեյ Երմակն է, որն ազատվել էր պաշտոնից նոյեմբերի վերջին՝ «Մինդիչգեյթ» կոռուպցիոն սկանդալի ֆոնին: Այդ ժամանակից ի վեր նրան մեղադրանք չէր առաջադրվել:

Ուկրաինայի Ազգային հակակոռուպցիոն բյուրոն (ՈւԱՀԲ/НАБУ) և Հատուկ հակակոռուպցիոն դատախազությունը (ՀՀԴ/САП) հայտարարել են, որ Երմակը կարող էր լինել «կազմակերպված խմբի մասնակիցներից մեկը, որը ներգրավված է 460 միլիոն գրիվնայի (մոտ 10,5 միլիոն դոլար) օրինականացման մեջ՝ Կիևի մոտակայքում իրականացվող էլիտար շինարարության վրա»:

Ըստ ՈւԱՀԲ-ի տվյալների՝ շինարարությունն իրականացվել է «Դինաստիա» քոթեջային ավանում: Ենթադրվում է, որ գործարարների և քաղաքական գործիչների մի խումբ, որի կազմում էին Տիմուր Մինդիչը և Ուկրաինայի նախկին փոխվարչապետ Ալեքսեյ Չեռնիշովը, պայմանավորվել են անձնական բնակության համար չորս առանձնատների ձեռքբերման շուրջ:

Յուրաքանչյուր առանձնատան մակերեսը կազմում է մոտ 1000 քառակուսի մետր, արժեքը՝ մոտ 2 միլիոն դոլար: Ռեզիդենցիաները կառուցվել են ընդհանուր ավելի քան 8 հեկտար մակերեսով հողատարածքների վրա, որոնց արժեքը կարող էր գերազանցել 6 միլիոն դոլարը, հայտնել են հակակոռուպցիոն մարմինները:

ՈւԱՀԲ-ի և ՀՀԴ-ի վարկածով՝ 2021-2025 թվականներին առանձնատների ապագա տերերը և այլ անձինք շինարարության ընթացքում լվացել են գրեթե 10 միլիոն դոլար:

Երմակը հրաժարվել է մեկնաբանել իրավիճակը մինչև քննչական գործողությունների ավարտը: «Ես հիմա ոչինչ չեմ մեկնաբանի, երբ քննչական գործողություններն ավարտվեն, ես հանդես կգամ մեկնաբանությամբ»,- ասել է նա։ Հարցին, թե արդյոք նա տուն ունի «Դինաստիա» կոոպերատիվի տարածքում, Ուկրաինայի նախագահի գրասենյակի նախկին ղեկավարը պատասխանել է. «Ես ոչ մի տուն չունեմ, ունեմ միայն մեկ բնակարան և մեկ ավտոմեքենա, որը դուք այստեղ տեսնում եք»:

Լրագրողները նաև հարցրել են՝ արդյոք նա՞ է «Մինդիչի ձայնագրություններում» հիշատակվող «Վիրաբույժը»: Երմակը պատասխանել է. «Իմ անունը Անդրեյ Երմակ է: Ես այլ անուն չունեմ»: Նախագահի գրասենյակը հրաժարվում է մեկնաբանություններից:

Զելենսկին Երմակին ազատել էր 2025 թվականի նոյեմբերի վերջին՝ «Մինդիչգեյթի» թեժ պահին: Դա պետական «Էներգոատոմ» ընկերության շուրջ ծավալված մասշտաբային կոռուպցիոն սկանդալ էր, որի կենտրոնում էր Մինդիչը՝ Զելենսկու ընկերն ու նախկին բիզնես գործընկերը: Ըստ քննության տվյալների՝ Մինդիչը հանցակիցների հետ ստեղծել էր մի համակարգ, որը թույլ էր տալիս «հետվճարներ» (ատկատներ) ստանալ ուկրաինական բոլոր ատոմային էլեկտրակայանների օպերատոր հանդիսացող «Էներգոատոմի» գնումների մեծ մասից:

radar armenia