Արհեստների միջազգային 5-րդ փառատոնն այս տարի կանցկացվի Մեղրիում

Արհեստների միջազգային 5-րդ փառատոնն այս տարի տեղի կունենա մայիսի 16-17 -ին՝  2026 թվականի ԱՊՀ մշակութային մայրաքաղաք Մեղրիում։ Հատկանշական է, որ այս տարի փառատոնը կմեկնարկի «Թանգարանների գիշեր» համաեվրոպական միջոցառման օրը` մայիսի 16-ին։ Փառատոնը Մեղրին կդարձնի արհեստների, ազգային մշակույթի և համեղ ուտեստների տոնական կենտրոն` համախմբելով վարպետների Հայաստանից, ԱՊՀ երկրներից, Վրաստանից և Իրանից։

Փառատոնն այս տարի կրում է «Ստեղծարար համայնք, կայուն ապագա» խորագիրը։ Մասնակիցներին սպասում է հայ և օտարազգի ժողովրդական վարպետների աշխատանքների ցուցահանդես-վաճառք` գորգագործություն, կարպետագործություն, ասեղնագործություն, խեցեգործություն, փայտարվեստ, դարբնություն և շատ ավելին, վարպետության դասեր, ազգային երգի ու պարի կենդանի կատարումներ, ավանդական խոհանոց` բացահայտելու Մեղրիին բնորոշ համերն ու խոհարարական գաղտնիքները, մանկական ծրագիր, լարախաղացի ներկայացում։

Համերգներով հանդես կգան «Կաթիլ» բենդը, Ժողովրդական արվեստների թանգարանի «Մանել» երգչախումբը, «Վարը Վարենկ» կրթամշակութային նախաձեռնությունը։

Փառատոնն իրականացվում է ՀՀ կրթության, գիտության, մշակույթի և սպորտի նախարարության նախաձեռնությամբ և աջակցությամբ` Հովհաննես Շարամբեյանի անվան ժողովրդական արվեստների թանգարանի հետ համագործակցությամբ, ինչպես նաև Մեղրիի համայնքապետարանի, Մշակույթի զարգացման հիմնադրամի և ԱՊՀ անդամ պետությունների հումանիտար համագործակցության միջպետական հիմնադրամի օժանդակությամբ։