Ինչ փաստաթղթեր է տվել Արմեն Ջիգարխանյանն որդուն՝ Ստեփան Ջիգարխանյանին (Տեսանյութ)

ԽՍՀՄ ժողովրդական արտիստ Արմեն Ջիգարխանյանը որոշել է 2-րդ կնոջ՝ Տատյանա Վլասովայի հետ չպայքարել փողի համար: Այս մասին հայտնի է դարձել ռուսական «Пусть говорят» հաղորդման ընթացքում: Դերասանը փաստաթուղթ է ստորագրել եւ հանձնել է Վլասովայի որդուն, որին ինքը որդեգրել է կնոջ հետ ամուսնանալուց հետո: 2015 թ. ամուսնալուծվելուց հետո նրանք պայքարի մեջ էին ԱՄՆ-ում գտնվող իրենց տան վաճառքից ստացված գումարի համար: Ըստ որդու՝ Ստեփան Ջիգարխանյանի՝ մեղավորը դերասանի 3-րդ կինն էր՝ երիտասարդ Վիտալինա Ցիմբալյուկ-Ռոմանովսկայան: «Ամեն ինչ վերջացավ նրանով, ինչով սկսել էր: 2-3 տարի առաջ, երբ առաջացավ ունեցվածքը կիսելու խնդիրը, նրան հարցրել էին՝ ինչ անել Դալասի տան հետ: Նա ասել էր. «Թող ինչ ուզում է, թող անի՝ ապրի այնտեղ, վաճառի, նորը գնի, ծախսի փողերը»: Հետո, ըստ երեւույթի, հայտնվեց Վիտալինան եւ ասաց, որ չի կարելի նվիրել ունեցվածքը, պետք է առավելագույնն ստանալ: Վիտալինայի անհետանալուց հետո, նրա կյանքում ամեն ինչ իր տեղն ընկավ»,- ասել է նա: Օրերս Ստեփան Ջիգարխանյանը 20 տարի անց կրկին հանդիպել է հոր հետ: Ջիգարխանյանն ինքն է իր ընկերների միջոցով խնդրել, որ նա գա: Տատյանա Վլասովայի հետ Ջիգարխանյանն ամուսնացած է եղել շուրջ 50 տարի: Նրանք ամուսնալուծվել են, քանի որ դերասանը ցանկացել է կյանքը կապել Վիտալինայի հետ: Այս տարվա հոկտեմբերից սկսված Ջիգարխանյանի ու երիտասարդ կնոջ հարաբերությունները մամուլի ուշադրության կենտրոնում են: Ջիգարխանյանը պնդում է, որ Վիտալինան գող է, որը հափշտակել է իր ունեցվածքը: Նոյեմբերի 27-ին նրանք պաշտոնապես ամուսնալուծվեցին: Ջիգարխանյանն ապրում է ընկերների նվիրած տանը: