ԼՂ-ն միշտ եղել է Ադրբեջանի կազմում, և ՀՀ-ն այն միշտ ճանաչել է Ադրբեջանի կազմում, ուղղակի դա թաքցվել է. Փաշինյան

ԼՂ-ն միշտ եղել է Ադրբեջանի կազմում, և ՀՀ-ն այն միշտ ճանաչել է Ադրբեջանի կազմում, ուղղակի դա թաքցվել է: Այդ մասին ճեպազրույցի ժամանակ հայտարարեց վարչապետ Նիկոլ Փաշինյանը:

Վարչապետը հիշեցրեց, որ օրերս Քաղաքաշինության կոմիտեի նախագահի զեկույցի շրջանակում տեղեկացել է, որ Հայաստանում տարաբնակեցման ծրագիր հաստատելու պրոցես է եղել, որին կցված փաստաթղթերում Հայաստանի արևելքի հատվածներում սահմանը գծված է այնպես, ինչպես արձանագրվել է խաղաղության նախաստորագրված համաձայնագրում, իսկ գծված սահմանից արևելք «մեծ տառերով գրված է Ադրբեջան», և որ դա ՀՀ կառավարության պաշտոնական փաստաթուղթ է:

«Մեր խնդիրն ի՞նչ է. որ ՀՀ ժողովրդից և Ղարաբաղի ժողովրդից թաքցվել է իրողությունը: Ինչո՞ւ է թաքցվել իրողությունը: Ինչո՞ւ է թաքցվել 1996 թվականի Լիսաբոնի գագաթնաժողովի իրողությունը, հիմա էլ փաստաթղթերն ամբողջությամբ հրապարակված են: Ինչո՞ւ աղմուկ-աղաղակ չկա այդ փաստաթղթերի մասին:

Չկա, քանի որ ամեն ինչ հրապարակված է, և ամբողջ ճշմարտությունը դրված է ժողովրդի առաջ, բայց այդ ճշմարտությունն ունի զարգանալու տեղ, որ այդ պատմությունն ընդամենը եղել է հետևյալը՝ ՀՀ անկախ պետության լինելը թույլ չտալը: Այդ պրոցեսը ղեկավարել են Լևոն Տեր-Պետրոսյանը, Ռոբերտ Քոչարյանը, հետո՝ Սերժ Սարգսյանը, հիմա էլ իրենց հարակից ռուսաստանա-բելառուսական օլիգարխներին են բերել՝ հասկանալով, որ իրենց քարտը մարված է»,- ասաց նա: