ՌԴ հատուկ ծառայությունները փորձում են միջամտել ՀՀ համապետական ընտրությանը

Ռուսաստանի հատուկ ծառայությունները փորձում են միջամտել մեր երկրում հունիսին կայանալիք համապետական ընտրությանը: Ճնշման գործիքներ են կիրառում հայազգի գործարարների նկատմամբ, ստիպում, որ նրանք հավաքագրեն տասնյակ հազարավոր ընտրողների, իրենց միջոցներով Հայաստան տեղափոխեն ու հարկադրեն իրենց պահանջած քաղաքական ուժի օգտին քվեարկել, պնդում է «Անկախ դիտորդ» դաշինքի ներկայացուցիչը։

Հայտնի է դարձել, որ կոնկրետ շրջանակներ մայիսի վերջին ու հունիսի առաջին օրերի համար արդեն իսկ հարյուրավոր ավտոբուսներ են ամրագրել: Փաստեր ունի նաև Հայաստանի արտաքին հետախուզության ծառայությունը։ Իրավապահները խոստանում են զգոն լինել, բացահայտել ու պատժել քրեորեն հետապնդելի ցանկացած արարք:

Պետեկամուտների կոմիտեն էլ ուժեղացնում է կանխիկ դրամի շրջանառության նկատմամբ սահմանային հսկողությունը:

Քաղաքագետները նշում են, որ օտար պետությունում կոպիտ միջամտության նման մեխանիզմը նոր չէ, բայց մեր երկրում առաջին անգամ են փորձում կիրառել, քանի որ համոզվել են՝ Հայաստանում այսօր հնարավոր չէ ընտրողներին կաշառել։