Կանադայի վարչապետը կոչ է արել ԱՄՆ-ին և Իսրայելին հարգել միջազգային իրավունքը

Կանադայի վարչապետ Մարկ Քարնին կոչ է արել Միացյալ Նահանգներին և Իսրայելին հարգել միջազգային իրավունքը Իրանի հետ հակամարտության հարցում և ընդգծել է արագ դեէսկալացիայի անհրաժեշտությունը։ «Մեզ նախապես չեն տեղեկացրել, մեզ չեն խնդրել մասնակցել», - ասել է Քարնին Ավստրալիա կատարած ուղևորության ժամանակ իրեն ուղեկցող լրագրողներին։ «Երևում է, որ այս գործողությունները հակասում են միջազգային իրավունքին»։

«Կանադան վերահաստատում է, որ միջազգային իրավունքը պարտադիր է պատերազմող բոլոր կողմերի համար։ Մենք կոչ ենք անում բոլոր կողմերին, այդ թվում՝ Միացյալ Նահանգներին և Իսրայելին, հարգել միջազգային ներգրավվածության կանոնները»,- հայտարարել է Կանադայի վարչապետը։ Նա ափսոսանք է հայտնել, որ Միացյալ Նահանգները և Իսրայելը, Իրանի դեմ ռազմական գործողություն սկսելով, չեն համագործակցել ՄԱԿ-ի կամ չեն խորհրդակցել դաշնակիցների հետ։

Քարնին կողմերին արագ դեէսկալացիայի կոչ է արել և հայտարարել, որ Օտտավան «պատրաստ է օգնել այդ նպատակին հասնելու գործում»։