Իսրայելը հարվածների նոր ալիք է սկսել Իրանի դեմ

ԱՄՆ-ի և Իսրայելի զինված ուժերը շարունակում են ռմբակոծել Իրանը։ Ըստ Իսրայելի պաշտպանության բանակի՝ Թեհրանում ամենաուժեղ հարվածները հասցվել են զենք և բալիստիկ հրթիռներ արտադրող օբյեկտներին։ Հարձակման են ենթարկվել Իրանի ռազմական և ներքին անվտանգության մի շարք հրամանատարական կենտրոններ։

Սպահանում ոչնչացվել են տասնյակ իրանական հրթիռային կայանքներ և զինամթերքի պահեստներ։ Ղոմում թիրախավորվել է Բանիմացների խորհրդի շենքը, որտեղ հոգևորականները հավաքվում են Իրանի նոր Գերագույն առաջնորդին ընտրելու համար։ Զոհեր չեն եղել, քանի որ մարդիկ նախապես տարհանվել էին։

ԱՄՆ-ն և Իսրայելը հայտարարել են, որ հարձակումներն անդառնալի վնաս են հասցրել Իրանի զինված ուժերին և նրա ամբողջ ռազմական ենթակառուցվածքին։ Դոնալդ Թրամփի խոսքով՝ Իրանն այլևս չունի ռազմաօդային, ռազմածովային և ՀՕՊ ուժեր: Իրանի օդային տարածքը ներկայումս վերահսկում են ամերիկյան և իսրայելական ուժերը։

Իր հերթին, իրանական բանակը պատասխանել է՝ անօդաչու թռչող սարքեր և հրթիռներ արձակելով Իսրայելի և Պարսից ծոցի այլ երկրներում գտնվող ԱՄՆ ռազմական բազաների ուղղությամբ։ Իրանական կողմը հավաստիացնում է, որ իր ռազմական ներուժն այնպիսի մակարդակի վրա է, որ թշնամին առաջիկա օրերին ստիպված կլինի դադարեցնել պատերազմը։

Թեհրանը սպառնացել է հարվածել Մերձավոր Արևելքի բոլոր տնտեսական կենտրոններին, եթե ԱՄՆ-ն և Իսրայելը շարունակեն իրենց գործողությունները Իսլամական Հանրապետության դեմ։ Իսլամական հանրապետությունը պատերազմին աջակցող եվրոպական երկրներին ևս զգուշացրել լուրջ հետևանքների մասին։