Սոչիի նկատմամբ ռուս զբոսաշրջիկների պահանջարկը նվազել է

Հունվարին և փետրվարին Սոչիի նկատմամբ ռուս զբոսաշրջիկների պահանջարկը նվազել է նախորդ տարվա համեմատ, հաղորդում է «Կոմերսանտը»՝ հղում անելով մի քանի տուրօպերատորների հարցումներին։ Ռուսաստանի տուրօպերատորների ասոցիացիայի փոխնախագահ Սերգեյ Ռոմաշկինի խոսքով՝ զբոսաշրջիկների հետաքրքրությունը Սոչիի նկատմամբ նվազել է 9%-ով։ «Ինտուրիստ» և «OneTwoTrip» ընկերությունները պահանջարկի անկումը գնահատում են 30%՝ նախորդ տարվա նույն ժամանակահատվածի համեմատ։ «Ռուսսկի էքսպրես» տուրօպերատորից հայտնել են, որ փետրվարին Կրասնոդարի երկրամասում հանգստի ամրագրումների թիվն ընդհանուր առմամբ նվազել է 8%-ով։

Որպես պատճառներից մեկը տուրօպերատորները նշում են անօդաչու թռչող սարքերի հարձակումների հետևանքով օդանավակայանի աշխատանքի հաճախակի դարձած սահմանափակումները։ «Կոմերսանտը» նշում է, որ փետրվարի 23-24-ը օդանավակայանը փակվել է հինգ անգամ, ինչը հանգեցրել է չվերթների ուշացումների։ Միևնույն ժամանակ, Սերգեյ Ռոմաշկինի խոսքով, Սոչին ավելի շատ է կախված օդանավակայանից, քան Կրասնոդարի երկրամասի մյուս հանգստավայրերը, քանի որ մեքենայով այստեղ հասնելն ավելի դժվար է՝ Ջուբգայից սկսվող շուրջ 170 կիլոմետր երկարությամբ լեռնային ոլորանների պատճառով։

Ինչպես նշում է «Կոմերսանտը», Կրասնոդարի երկրամասը մնում է Ռուսաստանի տարածաշրջանային զբոսաշրջային առանցքային շուկաներից մեկը։ «Travelline»-ի տվյալներով՝ դրան բաժին է ընկնում հյուրանոցային վաճառքների 14,3%-ը. ավելի բարձր ցուցանիշ ունի միայն Մոսկվան՝ 21,6%։ Ընդ որում, տուրօպերատորների գնահատմամբ՝ Սոչին ձևավորում է զբոսաշրջային հոսքի առնվազն մեկ երրորդը (30–35%), Անապան՝ 25%-ը, իսկ Գելենջիկը՝ 15%-ը։

Ռուսաստանի տուրօպերատորների ասոցիացիայի փոխնախագահի խոսքով՝ Սոչին շարունակում է մնալ ամենաթանկ ռուսական հանգստավայրը։