Մոդուլային ատոմակայան կառուցելու որոշումն ընդունվել է Հայաստանի էներգետիկ համակարգին նաև լրացուցիչ ճկունություն հաղորդելու նպատակով. Խուդաթյան

Հայաստանում մոդուլային ատոմակայանի կառուցմանն առնչվող հիմնական հարցերը նախատեսվում է հստակեցնել այս տարվա վերջին կամ 2027 թվականի ընթացքում: Դրանից հետո կսկսվի նախագծման փուլը, որին կհաջորդի կապալառու ընկերության որոշումը և շինարարական աշխատանքների մեկնարկը: «Արմենպրես»-ին տված հարցազրույցում այս մասին ասաց ՀՀ տարածքային կառավարման և ենթակառուցվածքների նախարար Դավիթ Խուդաթյանը:   

Նա նշեց, որ շարունակվում է տարբեր երկրների՝ ԱՄՆ, Ռուսաստանի, Չինաստանի, Կորեայի և Ֆրանսիայի շուրջ մեկ տասնյակ ընկերությունների առաջարկների ուսումնասիրությունը: Ընտրվելու է Հայաստանի էներգետիկ համակարգի կարիքներին և առանձնահատկություններին համապատասխանող, նաև ֆինանսական տեսանկյունից առավել նպատակահարմար տարբերակը: Միայն դրանից հետո կորոշվի կառուցվելիք ատոմակայանի մոդելը: «Այս պահին Հայաստանի կառավարությունը որոշել է միայն ատոմակայանի տեսակը՝ փոքր ռեակտորներից կազմված մոդուլային ատոմակայան: Նման ատոմակայան կառուցելու որոշումն ընդունվել է հաշվի առնելով տարբեր գործոններ, ամենից առաջ՝ Հայաստանի էներգետիկ համակարգին լրացուցիչ ճկունության հաղորդումը»,- նշեց նախարարը:  

Նա տեղեկացրեց նաև, որ առաջիկայում մեկնարկելու է Մեծամորի ատոմակայանի շահագործման ժամկետի երկարաձգման երկրորդ ծրագիրը, որի արդյունքում այն կգործի մինչև 2036 թվականը: Ըստ Դավիթ Խուդաթյանի՝ տեխնիկապես հնարավոր է Մեծամորի ատոմակայանը Հայաստանի էներգետիկ համակարգում պահել նաև մինչև 2046 թվականը, սակայն Կառավարությունն անելու է ամեն ինչ, որպեսզի դրա կարիքը չզգացվի: 

Թեմայի վերաբերյալ մանրամասներին կարող եք ծանոթանալ՝ դիտելով Դավիթ Խուդաթյանի հետ հարցազրույցի տեսանյութը։