Մեծ Բրիտանիան նախատեսում է ամռանն արգելել սոցցանցերի օգտագործումը 16 տարեկանից փոքր երեխաների համար

Մեծ Բրիտանիայի իշխանությունները կարող են արդեն 2026 թվականին արգելք սահմանել մինչև 16 տարեկան դեռահասների համար սոցիալական ցանցերի օգտագործման վրա։ Այս մասին փետրվարի 16-ին հայտնել է The Times թերթը՝ հղում անելով բրիտանական կառավարության իր աղբյուրներին։

Պարբերականի տեղեկություններով՝ կառավարությունը կսկսի «Ինտերնետային անվտանգության մասին օրենքի» լրամշակման հրատապ աշխատանքները։ Մասնավորապես նշվում է, որ իշխանությունները մտադիր են օպերատիվորեն վերացնել իրավական բացերը և պարտավորեցնել արհեստական բանականությամբ (ԱԲ) աշխատող բոլոր չատ-բոտերի մատակարարներին պահպանել գործող օրենսդրության շրջանակներում անօրինական բովանդակությանը հակազդելու պահանջները։