Ռուսաստանը գերտերություն չէ, նրա առավելագույն պահանջները չեն կարող բավարարվել բանակցություններում․ Կայա Կալլաս

Մյունխենի անվտանգության համաժողովի վերջին օրը ԵՄ արտաքին հարաբերությունների և անվտանգության հարցերով բարձր ներկայացուցիչ Կայա Կալլասը կոչ է արել ամրացնել եվրոպական պաշտպանությունը և հերքել է Եվրոպայի «քաղաքակրթական ոչնչացման» սպառնալիքի մասին ԱՄՆ վարչակազմի պնդումները։ «Ոմանց ասածին հակառակ, Եվրոպան քաղաքակրթական ոչնչացման սպառնալիքի առջև չէ։ Ընդհակառակը։ Մարդիկ դեռ ցանկանում են միանալ մեր ակումբին», — հայտարարել է նա իր ելույթի սկզբում՝ կիրակի, փետրվարի 15-ին։ Կալլասի խոսքով՝ «սպասողների ցուցակը բավականին երկար է», բայց նա հույս է հայտնել, որ «նրանք, ովքեր երկար ժամանակ սպասել են, այլևս շատ չեն սպասի»։

Ավելի վաղ ԱՄՆ անվտանգության թարմացված ռազմավարության մեջ հրապարակվել էին Եվրոպայի համար «քաղաքակրթական ոչնչացման» սպառնալիքի մասին պնդումներ։

Կալլասը նշել է Եվրոպայի ապագայի համար երեք առաջնահերթություն։ «Առաջինը եվրոպական պաշտպանությունն է։ Այն սկսվում է Ուկրաինայից, բայց մենք գիտենք, որ Ռուսաստանը կանգ չի առնի Դոնբասով։ Ուկրաինայից այն կողմ Ռուսաստանն արդեն փորձում է թուլացնել տնտեսությունները կիբերհարձակումների, արբանյակային խափանումների, ստորջրյա մալուխների դիվերսիայի, ապատեղեկատվությամբ դաշինքների ոչնչացման միջոցով, և, իհարկե, մնում է միջուկային սպառնալիքը։ Այս սպառնալիքներին դիմակայելու համար մենք աշխատում ենք եվրոպական անվտանգության նոր ռազմավարության վրա», — հայտարարել է Կալլասը։

Երկրորդ առաջնահերթությունը, ըստ նրա, Եվրոպայում կայունությունն է։ Այս համատեքստում «ռուսական իմպերիալիզմի հակաթույնը» ԵՄ ընդլայնումն է, պնդել է Կալլասը։

Եվրոպայի համար երրորդ առաջնահերթությունը միջազգային համագործակցությունն է։ «ԵՄ-ն կառուցել է աշխարհի ամենամեծ ազատ շուկան։ Մենք նաև ստեղծում ենք պաշտպանական դաշինքներ», — ասել է Կայա Կալլասը։

Խոսելով Ուկրաինայի դեմ պատերազմում Ռուսաստանի գրանցած արդյունքների մասին՝ Կալլասը նշել է. «Ռուսաստանը գերտերություն չէ։ Ավելի քան 10 տարվա հակամարտությունից հետո այն գրեթե առաջընթաց չի գրանցել Ուկրաինայում, և գինը 1,2 միլիոն զոհն է»։ ԵՄ արտաքին քաղաքականության ղեկավարի խոսքով՝ «Ռուսաստանը կոտրված է, նրա տնտեսությունը քանդված է, այն մեկուսացված է եվրոպական էներգետիկ շուկայից, իսկ քաղաքացիները հեռանում են սեփական երկրից»։ «Հիմնական սպառնալիքն այն է, որ Ռուսաստանը բանակցությունների սեղանի շուրջ ավելի շատ բան է ստանում, քան մարտադաշտում», — ասել է Կալլասը։

Կալլասն ընդգծել է, որ Ռուսաստանն Ուկրաինային ավերածություն է բերել և պետք է վճարի դրա համար. ըստ ԵՄ գլխավոր դիվանագետի՝ խաղաղությունը Կրեմլի նպատակը չէ։

Պատասխանելով միասնական եվրոպական բանակ ստեղծելու հնարավորության մասին հարցին՝ Կալլասը նշել է, որ եվրոպական յուրաքանչյուր երկիր արդեն ունի բանակ, և դրանցից 23-ը ՆԱՏՕ-ի մաս է կազմում: Եթե ստեղծվի միասնական եվրոպական բանակ, ինչպես նշել է Կալլասը, չափազանց շատ հարցեր կմնան անհասկանալի: «Օրինակ՝ արդյո՞ք Գերմանիան ստիպված կլինի ստեղծել նոր բանակ՝ բացի արդեն իսկ գոյություն ունեցողից: Եվ եթե ոչ, ինչպե՞ս է այն գործելու: Ո՞վ կտա հրամաններ, և ինչպե՞ս է այն գործելու ճգնաժամի ժամանակ», — նշել է նա:

«Իմ կոչն է. եկեք ժամանակ չվատնենք նոր բաներ քննարկելու վրա, պետք է կենտրոնանանք կարևորի՝ մեր բանակները հզորացնելու վրա, որպեսզի եվրոպացիները կարողանան ամրանալ ՆԱՏՕ-ի շրջանակներում», — կոչ է արել Կալլասը:

Մյունխենի անվտանգության համաժողովում կազմակերպված պանելային քննարկման ժամանակ եվրոպական դիվանագիտության ղեկավարը նշել է, որ, իր կարծիքով, ԵՄ երկրները դեռևս պատրաստ չեն խոսել Ուկրաինայի՝ Եվրամիությանը միանալու ամսաթվի մասին: «Դեռ շատ անելիք կա, բայց առաջնահերթությունն առաջ շարժվելն ու ցույց տալը, որ Ուկրաինան Եվրոպայի մաս է կազմում», — ընդգծել է նա։