Հին աշխարհն անցյալում է. Ռուբիոյի գլխավոր ուղերձը՝ Մյունխենի համաժողովին ընդառաջ

ԱՄՆ պետքարտուղար Մարկո Ռուբիոն հայտարարել է, որ աշխարհը «բեկումնային պահ» է ապրում։ Նա այս հայտարարությունն արել է Գերմանիա մեկնելուց առաջ, որտեղ մասնակցելու է Մյունխենի անվտանգության համաժողովին։ «Աշխարհը մեր աչքի առաջ շատ արագ է փոխվում։ Հին աշխարհն անցյալում է մնացել։ Անկեղծ ասած, դա այն աշխարհն էր, որտեղ ես մեծացել եմ։ Մենք ապրում ենք նոր աշխարհաքաղաքական դարաշրջանում, և դա մեզնից բոլորից կպահանջի վերաիմաստավորել՝ ինչ տեսք ունի այն և որն է լինելու մեր դերը»,- ասել է Ռուբիոն։

Մյունխենի համաժողովն անցկացվելու է փետրվարի 13-15-ին։ Ռուբիոյի գլխավորած ամերիկյան պատվիրակությունը բավականին խոշոր է։ Դրան մաս են կազմում նաեւ մոտ հինգ տասնյակ կոնգրեսական եւ երկու նահանգապետ։

Մյունխենի անվտանգության համաժողովը տեղի է ունենում բեկումնայի շրջանում, երբ իրար են բախվում Վաշինգտոնի եւ նրա եվրոպական դաշնակիցների մոտեցումները անվտանգության եւ նոր աշխարհակարգի հարցերում, խորանում են հակասությունները տրանսատլանտյան ապագայի շուրջ։

Համաժողովի քննարկման առանցքային թեմաները ռուս- ուկրաինական պատերազմն ու Իրանի շուրջ լարվածությունն են։ Ռուբիոն նշել է, որ հավանաբար փետրվարի 14-ին կհանդիպի Ուկրաինայի նախագահ Վոլոդիմիր Զելենսկու հետ։

Մյունխենի համաժողովից հետո նա կայցելի Հունգարի եւ Սլովակիա, որտեղ իշխանությունները չեն թաքցնում իրենց բացասական վերաբերմունքը ԵՄ կառույցների նկատմամբ։