Ձնաբքի պատճառով ԱՄՆ-ում ավելի քան 210 000 տուն մնացել է առանց էլեկտրաէներգիայի

ԱՄՆ-ում ձնաբքի ֆոնին էլեկտրաէներգիայից զրկված տների թիվը գերազանցել է 210 հազարը, վկայում են Poweroutage կայքի տվյալները։ Անջատումների ընդհանուր թիվը կազմել է 211 025։ Ամենաշատը դրանք գրանցվել են Լուիզիանայում (69 170), Միսիսիպիում (47 580) և Տեխասում (44 572)։

Ազգային օդերևութաբանական ծառայության կանխատեսման համաձայն՝ արևելյան Տեխասից մինչև Հյուսիսային Կարոլինա տարածաշրջանում սպասվում է առատ ձյուն և վտանգավոր սառցակալում։ Առնվազն 21 նահանգում հայտարարվել է արտակարգ դրություն։

Նշվում է, որ ԱՄՆ-ին կաթվածահար է արել ձմեռային «Ֆերն» փոթորիկը, կան նաև զոհեր։ Բքի, ձյան առատ տեղումների և սառցե անձրևների հետևանքով չեղարկվել է ավելի քան 13 000 ավիաչվերթ։