Ջորջ Քլունին 14 ընկերներին 1-ական միլիոն դոլար է նվիրել

Ընկերությունը չի կարելի փողով գնել, սակայն ընկերության մեջ կարելի է առատաձեռն լինել: Ասվածը սեփական օրինակով ապացուցել է հոլիվուդյան մեգաաստղ Ջորջ Քլունին, որն իր 14 ընկերներին 1-ական միլիոն դոլար է նվիրել:

Ինչպես նշում է Tatler-ը, այս մասին ամերիկյան MSNBC հեռուստաալիքին տված հարցազրույցում պատմել է նրա ամենամտերիմ ընկերներից մեկը՝ գործարար Ռենդի Գերբերը:

Պարզվում է՝ 2013թ. սեպտեմբերին Ջորջը Ռենդիին ու ևս 13 ընկերոջ ընթրիքի է հրավիրել իր տուն: Երբ հյուրերը հավաքվել են մի սեղանի շուրջ, տեսել են, որ աթոռներից ամեն մեկին սև պայուսակ է դրված: Այդ պահին Ջորջը ոտքի է ելել ու ասել.«Տղե՛րք, ուզում եմ իմանաք՝ որքան կարևոր եք ինձ համար: Դուք աջակցել եք ինձ, երբ դեռ նոր էի եկել Լոս Անջելես, թույլ էիք տալիս, որ ձեր տներում գիշերեի: Չգիտեմ՝ որտեղ կլինեի այժմ, եթե դուք չլինեիք: Ուզում եմ շնորհակալությունս հայտնել ձեզ: Բացեք ճամպրուկները»:

Գերբերի խոսքով՝ իրենք ճամպրուկներում 20 դոլարանոցներով դարսված մեկական միլիոն դոլար են գտել:

«Մենք բոլորս, իհարկե, շոկի մեջ էինք: Դրանից հետո Ջորջն իր քայլը բացատրեց հետևյալ կերպ.«Մեզնից յուրաքանչյուրի կյանքում բարդ շրջաններ են եղել, իսկ ոմանք էլ մինչև հիմա խնդիրներ ունեն: Այլևս ստիպված չեք լինի անհանգստանալ երեխաների, նրանց կրթություն տալու, հիփոթեքը վճարելու համար»,-պատմել է Գերբերը:

Նա նաև մանրամասնել է, որ Քլունին նախապես վճարել էր այդ գումարի համար հարկերը, ուստի՝ ընկերները ստիպված չեն եղել կառավարությանն անգամ մեկ ցենտ վճարել:

Տղամարդը պատմել է, որ ներկաներից որոշներին ֆինանսական օգնությունը խիստ անհրաժեշտ էր, ուստի՝ Քլունիի քայլը շատ տեղին է եղել:

«Մեր ընկերներից մեկն ընտանիքը պահելու համար բարմեն էր աշխատում օդանավակայանում ու ամեն առավոտ հեծանվով էր աշխատանքի գնում: Ժամանակին նա ու մյուս տղերքը հոգ են տարել Ջորջի մասին, այժմ նա ևս օգնեց ընկերներին»,-եզրափակել է Գերբերը: