Պորտլենդում ԱՄՆ դաշնային ծառայողների կրակոցից երկու մարդ է վիրավորվել

ԱՄՆ մաքսային և սահմանային հսկողության ծառայության գործակալները Օրեգոն նահանգի Պորտլենդ քաղաքում վիրավորել են երկու մարդու, տուժածները տեղափոխվել են հիվանդանոց։ Ոստիկանությունը բնակիչներին հանդարտության կոչ է արել, հայտնում է BBC-ին։

Միջադեպը տեղի է ունեցել Մինեապոլիսի ողբերգությունից մեկ օր անց։ Այնտեղ ներգաղթի ծառայության աշխատակիցը կրակել և սպանել էր 37-ամյա կնոջ, ինչը զայրույթի եւ բողոքի ցույցերի ալիք էր առաջացրել։

«Մենք հասկանում ենք Մինեապոլիսում տեղի ունեցած կրակոցից հետո առաջացած լարվածությունն ու զգացմունքները, սակայն խնդրում եմ բոլորին պահպանել հանգստություն` մինչեւ պարզենք տեղի ունեցածի հանգամանքները»,- հայտարարել է Պորտլենդի ոստիկանապետ Բոբ Դեյը։ Նա հավաստիացրել է, որ ոստիկանության աշխատակիցները որևէ առնչություն չունեն միջադեպին։

Ըստ նրա` իր աշխատակիցները մեկնել են ահազանգի վայր և հայտնաբերել են տղամարդու և կնոջ՝ «ակնհայտ հրազենային վնասվածքներով»։

Հետաքննությունների դաշնային բյուրոն հայտնել է, որ Պորտլենդում տեղի ունեցած միջադեպին մասնակից են եղել ԱՄՆ Մաքսային և սահմանապահ ծառայության գործակալները։

«Անթույլատրելի է անգործությունը, երբ խաթարվում են սահմանադրական երաշխիքները և աճում է զոհերի թիվը»,- հայտարարել է Պորտլենդի քաղաքապետ Քիթ Ուիլսոնը։ Նա կոչ է արել քաղաքում կասեցնել դաշնային ներգաղթային ծառայությունների գործողությունները մինչև լիարժեք հետաքննության ավարտը։

ԱՄՆ ներքին անվտանգության նախարարությունն իր գործակալների գործողությունները բացատրել է ինքնապաշտպանությամբ։ Սահմանապահ ծառայության գործակալները իրականացրել են ավտոմեքենայի նպատակային ստուգում։

Գերատեսչության հաղորդագրության համաձայն՝ վարորդը, որը ենթադրաբար վենեսուելական հանցախմբի անդամ է, փորձել է մեքենայով վրաերթի ենթարկել գործակալներին։ Նախարարության տվյալներով՝ ի պատասխան «գործակալը ինքնապաշտպանության նպատակով կրակոց է արձակել», որից հետո վարորդն ու ուղևորը հեռացել են դեպքի վայրից։

Մեկ օր առաջ Մինեապոլիսում ԱՄՆ Ներքին անվտանգության նախարարության կազմում գործող մեկ այլ գերատեսչության աշխատակիցը կրակել և սպանել էր 37-ամյա կնոջ։

Պաշտոնական վարկածի համաձայն՝ տեղի բնակչուհի Ռենե Գուդը փորձել էր ավտոմեքենայով վրաերթի ենթարկել ICE-ի աշխատակցին։ Տեղական իշխանությունները, հենվելով միջադեպի տեսանյութի վրա, վճռականորեն մերժում են այդ վարկածը։