Նոր ընդլայնված խմբասենյակ՝ Վայքի թիվ 3 մանկապարտեզում

ԿԳՄՍ նախարարության հանրակրթության վարչության պետ Թամարա Սարգսյանը ներկա է եղել Վայքի թիվ 3 մանկապարտեզում ընդլայնված խմբասենյակի բացման արարողությանը: Միջոցառմանը մասնակցել է նաև ՅՈՒՆԻՍԵՖ-ի կրթության բաժնի ղեկավար Ալվարդ Պողոսյանը:

Նախադպրոցական ուսումնական հաստատություններում նոր խմբասենյակները ստեղծվել են «Կրթությունը չի կարող սպասել» հիմնադրամի աջակցությամբ՝ ՅՈՒՆԻՍԵՖ-ի կողմից իրականացվող Հայաստանում փախստականների կարիքներին արձագանքման ծրագրի շրջանակում: Ծրագիրն իրականցվել է 2023թ. հոկտեմբերից ԿԳՄՍ և ՏԿԵ նախարարությունների հետ՝ Արմավիրի, Արարատի, Կոտայքի և Վայոց ձորի մարզերում: Ծրագրի շրջանակում բացվել է 11 նոր խմբասենյակ:

Ծրագրի նպատակը նախադպրոցական կրթական ծառայությունների հասանելիության բարձրացումն է։ Այն իրականացվել է երեք հիմնական ուղղությամբ՝

• հանրային մանկապարտեզների տարածքների վերանորոգում և նոր խմբասենյակների ստեղծում,
• կահավորում ու անհրաժեշտ նյութատեխնիկական բազայով հագեցում,
• անձնակազմի կարողությունների ամրապնդում՝ ներառյալ սոցիալ-հուզական աջակցություն, ներառական մանկավարժություն և ծնողական կրթություն։

Այս համալիր մոտեցումն ապահովում է ինչպես տեղերի քանակի ավելացում, այնպես էլ ծառայությունների որակի բարձրացում։