Իսրայելի բանակը պաշտոնանկ է արել զինվորականների

Իսրայելի զինված ուժերի հրամանատարը կիրակի օրը պաշտոնանկ է արել մի քանի բարձրաստիճան զինվորականների և նկատողություն հայտնել մի քանիսին՝ 2023 թվականի հոկտեմբերի 7-ի ձախողումների մեջ ունեցած դերի համար, երբ պաղեստինյան ՀԱՄԱՍ խմբավորումը հանկարծակի հարձակվել էր Իսրայելի հարավի վրա Գազայից, հայտնում է Reuters-ը։

Վերջին կարգապահական միջոցները ձեռնարկվել են այն պայմաններում, երբ իսրայելական պաշտոնյաները բախվում են աճող հասարակական ճնշման, որը պահանջում է նրանց պատասխանատվության ենթարկել հարձակման հանգեցրած ձախողումների համար։

Իսրայելի տվյալներով, հոկտեմբերի 7-ի հարձակման հետևանքով ՀԱՄԱՍ-ի և այլ պաղեստինյան խմբավորումների կողմից Իսրայելում զոհվել է մոտ 1200 մարդ, շուրջ 250-ը վերցվել են պատանդ։ Այդ հարձակումը հրահրեց Իսրայելի ցամաքային և օդային արշավը Գազայում, որը, տեղական առողջապահական մարմինների տվյալներով, ամայացրել է անկլավի զգալի մասը և խլել ավելի քան 69 հազար մարդու կյանք։

Իսրայելն ու ՀԱՄԱՍ-ը ԱՄՆ-ի միջնորդությամբ անցած ամիս համաձայնության էին եկել հրադադարի շուրջ՝ որպես պատերազմի դադարեցման ծրագրի առաջին փուլ։