Հանթեր Բայդենը հրաժարվել է ներողություն խնդրել ԱՄՆ առաջին տիկնոջից՝ չնայած դատական հայցի սպառնալիքին

Պատճառը Քալահանին տված Բայդենի մեկ այլ հարցազրույցն էր, որը հրապարակվել էր օգոստոսի 5-ին YouTube-ում, որտեղ նա պնդում էր, որ դատապարտված սեռական հանցագործ Ջեֆրի Էփշտեյնն է «Մելանիային ծանոթացրել» Դոնալդ Թրամփի հետ։

Օգոստոսի 6-ին Մելանյա Թրամփի փաստաբան Ալեխանդրո Բրիտոն նամակ է ուղարկել Բայդենին՝ պահանջելով հեռացնել և հերքել այդ խոսքերը՝ դրանք «կեղծ, զրպարտչական, վիրավորական և սադրիչ» անվանելով և սպառնացել է 1 միլիարդ դոլարի դատական հայցով։

Նույն նամակում Բրիտոն հայտարարել է, որ Բայդենի աղբյուրը գրող Մայքլ Վուլֆն է, որի մեղադրանքները նախկինում հրապարակվել էին The Daily Beast-ում։ Հրապարակման դադարեցման մասին պահանջից հետո The Daily Beast-ը ներողություն է խնդրել առաջին տիկնոջից և հեռացրել հոդվածը։ Ըստ փաստաբանի՝ չնայած դրան, Բայդենը «գիտակցաբար շարունակել է կեղծ և զրպարտչական հայտարարություններ» տարածել։

Նոր տեսանյութում Բայդենը կտրուկ արձագանքել է պահանջներին. «Գրողի ծոցը, նման բան տեղի չի ունենա»։ Նա Դոնալդ և Մելանյա Թրամփին անվանել է «կռվարներ», որոնք, նրա կարծիքով, փորձում են վախեցնել իրեն դատական ​​հայց ներկայացնելու սպառնալիքներով։ Նա ասել է նաև, որ պատրաստ կլինի ցուցմունք տալ, որի ժամանակ Թրամփները կարող են պարզաբանել Էփշտեյնի հետ իրենց կապերի բնույթը։

Առաջին տիկնոջ ներկայացուցիչ Նիք Քլեմենսը նշել է, որ իր փաստաբաններն «ակտիվորեն ձգտում են անհապաղ հերքումներ և ներողություն կորզել չարամիտ, զրպարտչական հայտարարություններ տարածողներից»։

Թրամփը և նրա կինը ավելի վաղ պնդել են, որ հանդիպել են 1998 թվականին Նյու Յորքի նորաձևության շաբաթվա ընթացքում կազմակերպված երեկույթի ժամանակ, որտեղ նրանց հրավիրել էր մոդելային գործակալ Պաոլո Զամպոլլին