Կարծում եմ՝ մարդասիրական ժեստ կիրականացվի և փաստաթղթերի ստորագրումից հետո կլուծվի գերիների վերադարձի հարցը. Սահակյան

Բաքվում ապօրինի պահվող հայ գերիները բացարձակ մեկուսացված են, քանի որ Կարմիր խաչի գործունեությունը Ադրբեջանում փաստացի դադարեցված է։ Այս մասին այսօր՝ օգոստոսի 13–ին, NEWS.am–ի հետ զրույցում ասաց Մարդու իրավունքների եվրոպական դատարանում (ՄԻԵԴ) հայ ռազմագերիների ներկայացուցիչ և փաստաբան Սիրանուշ Սահակյանը՝ նշելով, որ թեև իրավական առումով գրասենյակն իր ներկայությունը Ադրբեջանում կպահպանի մինչև սեպտեմբեր, սակայն բովանդակային գործունեություն իրականացնելու հնարավորություն չունի։

«Այս անձինք բացարձակ մեկուսի պայմաններում են պահվում, արտաքին աշխարհի հետ կապը բացառապես հեռախոսազանգերի միջոցով է պահպանվում, նրանց ֆիզիկական վիճակը, հոգեբանական դրությունը դիտարկող որևէ անկախ մարմին գործունեություն չի իրականացնում։ Այլ տեղաշարժեր դատավարությունում չկան, դատական նիստերը նախանշված տեմպով ընթանում են, ելքը կանխորոշելի է։ Մենք բազմիցս նշել ենք, որ խնդիրը քաղաքական է, հայ գերիներն իրապես ունեն պատանդի կարգավիճակ, քանի որ նրանց ազատ արձակումը կապված է քաղաքական օրակարգում առկա հարցերի լուծումից։ Իսկ առաջնահերթություն ներկայացնող հարցը հենց խաղաղության համաձայնագրի ստորագրումն է։ Ադրբեջանը գերիների խնդրով ձևավորել է նոր լծակ, ինչը բազմիցս գործարկվել է։ Մեր գնահատմամբ, բացառապես այս գործընթացի համատեքստում, քաղաքական ճանապարհով է հնարավոր լինելու 23 հայերի ազատ արձակումը»,–ասաց նա։

Սիրանուշ Սահակյանը նշեց, որ հաշվի առնելով օգոստոսի 8-ին Վաշինգտոնում «խաղաղության պայմանագրի» նախաստորագրման հանգամանքը, այս փուլում բարձր է գնահատում գերիների վերադարձի հավանականությունը։ Նա հիշեցրեց նաև, որ Վաշինգտոնում տեղի ունեցած հանդիպումների ընթացքում գերիների խնդրի մասին նաև ԱՄՆ նախագահ Դոնալդ Թրամփն է բարձրաձայնել։

«Կարծում եմ՝ մարդասիրական ժեստ է իրականացվելու և փաստաթղթերի ստորագրումից հետո լուծվելու է նրանց վերադարձի հարցը։ Մտահոգությունները կարող են կապված լինել հարցի հետ, թե վերադարձը տեղի կունենա փուլային տարբերակով, թե՞ 23 գերիները միանգամից կհայրենադարձվեն։ Չեմ բացառում, որ Ադրբեջանը գնա փուլային տարբերակի»,–հավելեց Սահակյանը։

Սիրանուշ Սահակյանը նշեց, որ իրականացված փաստահավաք գործունեության արդյունքում կարողացել են փաստաթղթավորել գերեվարման առնվազն 80 դեպքեր, որոնք Ադրբեջանի իշխանությունների կողմից չեն ընունել և չեն հաստատվել։

«Քանի որ Ադրբեջանը տարբեր խողովակներով մերժել է այս անձանց՝ իր մոտ անազատության մեջ գտնվելու հանգամանքը, մարդու իրավունքների տեսանկյունից այս խումբը փոխել է իր իրավական ռեժիմը, և մենք գործ ունենք բռնի անհտացած անձանց հետ։ Առնվազն 80 դեպքի մասին է խոսքը, բայց մենք չենք բացառում, որ թվերն անհամեմատ ավելի մեծ լինեն»,–հավելեց Սահակյանը։