Թրամփն ու Մերցը պայմանավորվել են համագործակցել Ուկրաինայում կարգավորման հարցում

Գերմանիայի կանցլեր Ֆրիդրիխ Մերցը մայիսի 8-ին առաջին հեռախոսազրույցն է ունեցել ԱՄՆ նախագահ Դոնալդ Թրամփի հետ։ Այդ մասին գրում է Tagesschau-ն՝ հղում անելով Գերմանիայի կառավարության պաշտոնական ներկայացուցիչ Շտեֆան Կոռնելիուսին։

Ֆրիդրիխ Մերցը նշել է, որ աջակցում է Ուկրաինայում հակամարտության դադարեցմանն ուղղված ԱՄՆ-ի ջանքերին, ասել է պարոն Կոռնելիուսը։ «Ռուսաստանը պետք է համաձայնվի հրադադարի, որպեսզի հնարավորություն ստեղծվի բանակցությունների համար», — հայտարարել է Գերմանիայի կառավարության ներկայացուցիչը։

Իր կանցլեր դառնալուց հետո՝ Welt-ին տված հարցազրույցում, պարոն Մերցը նշել է, որ հրադադարի հնարավոր հաստատումից հետո Ուկրաինայի անվտանգությունն ապահովված կարող է լինել Եվրոպայի և ԱՄՆ-ի կողմից բանակին ցուցաբերվող աջակցությամբ։

Քրիստոնեադեմոկրատական և Քրիստոնեասոցիալական միությունների դաշինքի (ՔԴՄ/ՔՍՄ) առաջնորդ Ֆրիդրիխ Մերցը դարձել է Գերմանիայի նոր կանցլերը՝ մայիսի 6-ին Բունդեսթագում կայացած քվեարկության երկրորդ փուլում։ Նրա օգտին քվեարկել է խորհրդարանի 325 պատգամավոր։