Զելենսկին մերժել է մայիսի 9-ի առիթով Պուտինի հրադադարը եւ անհապաղ 30-օրյա հրադադար պահանջել

Մի քանի օրով հրադադարի փոխարեն Ուկրաինայի ղեկավարը պահանջել է «անհապաղ, ամբողջական եւ անվերապահ» ​​զինադադար՝ առնվազն 30 օրով։ «Երաշխավորված եւ հուսալի լինելն այն է, ինչը կարող է հիմք հանդիսանալ իրական դիվանագիտության համար», - ընդգծել է Զելենսկին։ Նա նաեւ հիշեցրել է, որ ԱՄՆ-ը խաղաղ բանակցությունների շրջանակում դեռ մարտ ամսին առաջարկել է դադարեցնել ռազմական գործողությունները մեկ ամսով, եւ Կիեւը համաձայնել է դա անել։ Իր հերթին Սպիտակ տունը հայտնել է, որ ԱՄՆ նախագահ Դոնալդ Թրամփը նույնպես ցանկանում է տեսնել մշտական, այլ ոչ թե ժամանակավոր զինադադար։ Սպիտակ տան մամուլի քարտուղար Քերոլայն Լեւիթը հայտնել է, որ շարունակվող մարտերը Թրամփին ավելի ու ավելի են հիասթափեցնում ինչպես Պուտինից, այնպես էլ Զելենսկուց:

Ավելի վաղ Կրեմլը միակողմանի զինադադար էր հայտարարել՝ ի պատիվ Հաղթանակի 80-ամյակի։ Այն կգործի մայիսի 8-ի կեսգիշերից մինչեւ մայիսի 11-ի կեսգիշերը։ ՌԴ նախագահի մամուլի քարտուղար Դմիտրի Պեսկովն այս որոշումը անվանել է Պուտինի «բարի կամքի դրսեւորում», ինչը ցույց է տալիս, որ Ռուսաստանը պատրաստ է «խաղաղ կարգավորման հետագիծ մտնել»։ Միաժամանակ Կրեմլն ընդգծել է, որ հրադադարի խախտման դեպքում ուկրաինական կողմին կտրվի «համարժեք եւ արդյունավետ պատասխան»։