Տխրահռչակ մաքսանենգի՝ պեղումների վայրից գողացված հին հունական ամֆորան հանվել է աճուրդից

Լոնդոնի Մեյֆեյր շրջանի Kallos պատկերասրահի ղեկավարությունը վաճառքից հանել է մ.թ.ա. 550 թվականին պատրաստված նեղ վզիկով երկկոթանի սև ամֆորան, երբ The Observer-ը՝ հնությունների ապօրինի առևտրի փորձագետի բարձրացրած մտահոգությունների առնչությամբ դիմել է պատկերասրահին:

Հնագետ և թալանված հնությունների և ապօրինի առևտրի ցանցերի գծով մասնագետ, դոկտոր Խրիստոս Ցիրոգիաննիսն ապացույցներ է գտել, որոնք նրան դրդել են եզրակացնել, որ ամֆորան, ըստ ամենայնի, աճուրդ է մտել Իտալիայում ապօրինի պեղումներից:

Նա նկատել է ամֆորան, երբ անցյալ ամիս պատկերասրահն այն առաջարկել է ցուցադրել  արվեստի և հնաոճ իրերի՝ աշխարհի խոշորագույն տոնավաճառներից մեկում՝ Tefaf Maastricht-ում, և այն համեմատել է Polaroid-ի լուսանկարի հետ, որում նույն առարկան երևում էր Իտալիայում 2004 թվականին գողացված արտեֆակտների թրաֆիքինգի համար դատապարտված Ջակոմո Մեդիչիի ձեռքում:

Ապրանքը գնահատվում է մոտ 50 հազար ֆունտ ստեռլինգ:

Kallos Gallery-ը 2014 թվականին հիմնադրել է բարոն Լորնե Թիսսեն-Բորնեմիսան՝ հանգուցյալ բարոն Հանս Հենրիխ ֆոն Թիսսեն-Բորնեմիսայի որդին՝ շվեյցարացի միլիարդատեր, որը հավաքել է աշխարհում արվեստի ամենամեծ մասնավոր հավաքածուն։

Ամֆորան ունի 23,6 սմ բարձրություն և զարդարված է սֆինքսներով, խոյով ու առյուծով։ Այն վերագրվում է Ֆինեուս անվամբ մի նկարչի։

Պատկերասրահի ներկայացրած հավաքածուի պատմությունը սկսվում է միայն 1986 թվականից: Սա Ցիրոգյաննիսի մեջ կասկածներ առաջացրեց, որ սափորը կարող էր ապօրինի պեղումների մաս լինել:

Քեմբրիջի համալսարանի հնագիտության դասախոս Ցիրոգիաննիսը Կորֆուի Հոնիական համալսարանի ՅՈՒՆԵՍԿՕ-ի՝ մշակութային ժառանգության սպառնալիքների հարցերով ամբիոնում ղեկավարում է հնությունների ապօրինի շրջանառության վերաբերյալ հետազոտությունները:

19 տարվա ընթացքում Ցիրոգյաննիսը հայտնաբերել է ավելի քան 1700 թալանված հնատիպ առարկաներ՝ ահազանգելով ոստիկանությանը և դեր խաղալով դրանց՝ 15 երկրի վերդարձնելու հարցում: