Թրամփը հայտարարել է ներմուծվող չիպերի վրա նոր մաքսատուրքերի մասին

ԱՄՆ նախագահ Դոնալդ Թրամփը հայտնել է, որ հաջորդ շաբաթ կհայտարարի կիսահաղորդիչների ներմուծման մաքսատուրքերի մասին, հայտնում է Reuters-ը։ Նա հավելել է, որ «ճկուն կլինի» ոլորտի որոշ ընկերությունների հետ կապված։

Ավելի վաղ Politico-ն հայտնել էր նոր մաքսատուրքեր մտցնելու Թրամփի ծրագրերի մասին։ Հրատարակության համաձայն՝ ԱՄՆ նախագահը պատրաստվում է հանձնարարել ԱՄՆ Առևտրի նախարարությանը հետաքննություն սկսել, որը կարող է հանգեցնել կիսահաղորդչային տեխնոլոգիաների նոր մաքսատուրքերի սահմանմանը։

Ինչպես նշում է Politico-ն, այս քայլը պայմաններ կստեղծի ԱՄՆ-ի և Արևելյան Ասիայի խոշոր տնտեսությունների միջև հարաբերությունների հետագա սրման համար, որոնցից երկիրը գնում է իր չիպերի մեծ մասը, օրինակ՝ Թայվանը։ Որոշումը հեռահար հետևանքներ կունենա ամերիկյան խոշոր տեխնոլոգիական ընկերությունների համար, որոնք ապավինում են ներմուծվող չիպերին: