Ֆրանսիան և Կանադան սկսել են հետախուզական տվյալների փոխանակումը

Կանադայի վարչապետ Մարկ Քարնիի գրասենյակը հայտարարել է Օտտավայի եւ Փարիզի միջեւ անվտանգության եւ հետախուզական տվյալների փոխանակման ոլորտում նոր գործընկերության մեկնարկի մասին, ասվում է Կանադայի ղեկավարի գրասենյակի կայքում:

«Վարչապետ Մարկ Քարնին այսօր Փարիզ կատարած այցի ընթացքում հանդիպել է Ֆրանսիայի նախագահ Էմանուել Մակրոնի հետ: Վարչապետն ու նախագահն ընդգծել են հետախուզության և անվտանգության ոլորտում երկկողմ նոր գործընկերության մեկնարկը: Գործընկերությունը կենտրոնանալու է կիբեռանվտանգության ուժեղացման եւ խոշոր սպառնալիքներին վերաբերող հետախուզական տվյալների փոխանակման վրա», - ասված է մամուլի հաղորդագրության մեջ:

Հրապարակման համաձայն՝ համագործակցության առանցքային թեմաներն են լինելու տնտեսական անվտանգությունը, զանգվածային ոչնչացման զենքի տարածման կանխարգելումը, լրտեսությունը, դիվերսիաները, ինչպես նաև առաջադեմ տեխնոլոգիաների հետ կապված սպառնալիքները: