Թրամփն արգելել է տրանսգենդերներին մասնակցել մարզական մրցումներին ուսումնական հաստատություններում

ԱՄՆ նախագահ Դոնալդ Թրամփը գործադիր հրաման է ստորագրել, որով արգելվում է սեռափոխ տղամարդկանց մասնակցել կանանց սպորտային մրցումներին։ Ստորագրումը հեռարձակվել է չորեքշաբթի C-SPAN հեռուստաալիքով։ «Կանանց սպորտն այսուհետ լինելու է բացառապես կանանց համար»,- ասել է Թրամփը հրամանի ստորագրումից առաջ ունեցած ելույթում։

Նա մեղադրել է ԱՄՆ նախորդ վարչակազմին «արմատական ձախ գաղափարներին» աջակցելու և «կենսաբանական սեռի բուն հասկացությունից հրաժարվելու» մեջ։ «Աղջիկ ներկայացած տղամարդիկ նրանցից գողացել են ավելի քան 3500 մրցույթ, ինչը շատ է, և մասնակցել են կանանց համար նախատեսված ավելի քան 11 հազար մրցույթների»,- ընդգծել է ամերիկացի առաջնորդը։

Թրամփը հայտնել է, որ իր ստորագրած հրամանը դադարեցնելու է դաշնային ֆինանսավորումը և կսկսի հետաքննություններ ամերիկյան կրթական հաստատությունների նկատմամբ՝ թույլ չտալով կենսաբանական արական սեռի ներկայացուցիչներին մասնակցել կանանց սպորտային մրցումներին:

Բացի այդ, Թրամփի հրամանի համաձայն, ԱՄՆ ներքին անվտանգության նախարարությունը մերժելու է սեռափոխության ենթարկված տղամարդ մարզիկներին ԱՄՆ վիզաների տրամադրումը։ «Այս հրամանագիրը նշանակում է կանանց սպորտի համար պայքարի ավարտ»,- նշել է նա՝ ընդգծելով, որ «դա վաղուց պետք է արվեր»։