Դոնալդ Թրամփը Նոր տարին դիմավորել է Իլոն Մասկի հետ պարելով

Նորընտիր նախագահ Դոնալդ Թրամփը եւ կինը՝ Մելանյա Թրամփը, Նոր տարին դիմավորել են Մար-ա-Լագոյի իրենց կալվածքում՝ կազմակերպելով երեկույթ, որին ներկա են եղել հայտնի հյուրեր, որոնց թվում էր նաեւ Իլոն Մասկը։

Աշխարհի ամենահարուստ մարդը երեկույթին ժամանել էր իր կրտսեր որդու՝ X AE A-XII-ի հետ։

Մի քանի ներկաներ տեսանյութեր եւ լուսանկարներ են հրապարակել աստղային միջոցառումից, որոնցում երեւում է, թե ինչպդես է Մասկը ողջ երեկոյի ընթացքում պարում իր որդու եւ Թրամփի հետ: Մի պահ Մասկին եւ Թրամփին նկատել են 1978 թվականի «Y.M.C.A» հիթի ներքո Թրամփի հայտնի պարային շարժումները կատարելիս։

Թրամփի հարսը՝ Լարա Թրամփը, նույնպես մի պահ բեմ է բարձրանում՝ երգելու մի քանի երգ, այդ թվում՝ Թոմ Պետիի եւ Heartbreakers-ի «I Won't Back Down»-ը: